Насловна

Поглед

Лустратори на бандаж

Жаклина Хаџи-Зафирова

Комисијата за лустрација веќе подолго време функционира онака како што се и релациите меѓу власта и опозицијата - на бандаж. Нема ама буквално едно прашање околу кое во последно време, по изборите, можат да се согласат власта и опозицијата, па така се случи тоа и со изборот на првиот човек на Комисијата. Иако претходно беше договорено тој да биде член предложен од СДСМ, не се случи тоа.

Изненадување беше предлогот Агим Мехмети да биде избран за претседател на Комисијата, со образложение дека претходното решение престанува да важи за новиот парламентарен состав, иако неговото име се спомна по претходната бура расправии околу членовите во Комитетот за односи меѓу заедниците. Но, и за тоа пратениците од власта и опозицијата не можеа да се договорат.

И додека едните и другите си мерат зборови и кандидати, досегашниот претседател на Комисијата за лустрација, Томе Аџиев, и понатаму останува на функцијата. Тој убедливо држи рекорд со едногодишното претседателствување со Комисијата, во која кандидатите на опозицијата не го криеја незадоволството од одлуките за тоа кој и како се прогласува за кодош. Па, се случуваше да ги напуштаат седниците, посочувајќи дека Аџиев не случајно ги отфрла сите нивни предлози. Тој постојано е критикуван за селективност со лустрираните, бидејќи меѓу нив немало ниту еден претставник од власта.

За тоа како оди лустрацијата има критики и од експертите кои порачаа дека со процесот треба да се дојде до помирување и извинување. Но, таа лекција ќе почека друг училиштен час.