Насловна

Ласерски радари ќе ги ловат бесните возачи

Заборавете на антирадарите и на другите финти. Ништо не ќе може да ве спаси од казна доколку возите пребрзо

Даниела Трпчевска



Полицијата со нови ласерски радари ќе ги лови непослушните возачи. Сите оние што користеле финти досега или набавувале антирадари во странство што ќе им сигнализираат каде се крие сообраќајната полиција во заседа ќе мора да заборават на тоа и да внимаваат на брзината со која возат. Новите ласери едноставно не можат да бидат фатени навреме на ваквите шпионски апаратчиња на возачите, а освен што ги фотографираат возилата и нивните таблички, тие обезбедуваат и видоезапис, кој може да се користи во судска постапка. Така што возачот и да успее да и' побегне на сообраќајната контрола, не ќе може да се спаси од казна. Таа ќе му стигне на домашна адреса и ќе мора да ја намири во определен рок.

Ласерските радари „при ласер III“ и „ласер кам II“ веќе се пристигнати во земјава и наскоро полицијата ќе почне да ги користи при секојдневните сообраќајни контроли. Овие радари веќе се користат на патиштата во Словенија, Хрватска и во Србија.

Според Кузман Данчевски, виш советник за сообраќај во МВР, со првиот радар брзината се мери стоечки „од рака“, од возило во мирување или со ногарки со чија помош се постигнува поголема стабилност при мерења на поголеми растојанија.

Вториот ласерски радар има и дигитален фотоапарат што е поставен и прицврстен на горната површина од радарот. Тој содржи податоци за регистарскиот број на возилото, датумот, времето и измерената брзина со кое е снимено возилото. Сите тие податоци можат да се отпечатат во форма на фотографија, каде што се испишуваат податоците за сообраќајниот полицаец што го извршил мерењето и локацијата каде што е извршено мерењето на брзината.

„Битно е да се истакне дека овој уред детекторите за радари го откриваат непосредно кога возилото е означено, односно кога се врши мерењето брзина. Значи, нема детектирање додека уредот за мерење не е во функција“, вели Данчевски. Користењето антирадари е забрането, па затоа доколку сообраќајната контрола го фати возачот да користи ваков апарат, веднаш му се наредува да го отстрани.

Осовременувањето на радарската опрема, според надлежните, е нужно со оглед на тоа дека големата брзина е еден од еден од најголемите причинители за сообраќајните незгоди, кои често завршуваат фатално, со жртви.

Статистичките податоци во земјава покажуваат дека пребрзото возење е причина за една третина од вкупниот број случени сообраќајни незгоди. Според Законот за безбедност на сообраќајот на патиштата, за пребрзо возење се предвидени казни до 300 евра или ако ја платите глобата во рок од осум дена, тогаш ќе платите 150 евра. Покрај глобата е предвидена и забрана за управување со моторно возило во траење од три до 12 месеци, која ја изрекува надлежниот Суд за прекршоци, иако сте ја платиле предвидената глоба.

Како што укажуваат од Сообраќајната полиција, фреквентноста на возилата во летниот период неколкукратно е зголемена на сите патиштата што водат до туристичките места во земјава. На тие точки се најзастапени радарските проверки, особено на меѓународниот Коридор 10, од граничниот премин Табановце до Гевгелија, како и на Коридорот 8 од граничен премин Деве Баир до Охрид, Струга и граничниот премин Ќафасан.

„Сообраќајната полиција врши мерење брзина на движење на возилата со радари на посебни однапред одредени места на автопатиштата, магистралните и регионалните патишта. Радарите се поставуваат на одредени места што се најпогодни за контрола на брзината на возилата и места кои во изминатиот период се покажале како критични“, велат од МВР.

Радари во Скопје има на сите булевари, како и на улиците „Првомајска“, „Иво Лола Рибар“ и „Адолф Циборовски“. Контроли има и на излезот и на влезот на градот кај клучката Дијамант и наспроти влезот на „Алкалоид“. Брзината на возилата се мери и на регионалниот пат Скопје - Велес кај селото Трубарево, селото Идризово, населбата Дрма, селата Петровец и ’Ржаничино.

На радари може да наидете и на регионалниот пат Скопје – Куманово, кај клучката Арачиново и пред селото Арачиново. Полициската станица во Драчево ги користи радарите кај селата Батинци, Варвара, Морани и Студеничани, на улицата „Првомајска“ кај „Бујото“ и „Мебел Ви“.

Најголем дел од радарите се сконцентрирани на локации во западниот дел на земјава, особено на патот кон Охрид и Струга. Контролите се зајакнати на излезот од Скопје, потоа на регионалниот пат Групчин – Тетово кај автоотпадите, но и на регионалниот пат Тетово – Јажинце, кај селата Непроштено, Џепиште, Лешок, Теарце и Доброште.

Гостиварската полиција ги лови брзите возачи кај селата Градец, Чегране, Србиново и Речане. Доколку ја зголемите близината при влезот во Кичево, радарите ќе ве лоцираат на патот Кичево – Охрид кај селата Другово и Пополжани.

Внимавајте како возите и кај штипското село Три Чешми и на магистралниот пат Штип - Радовиш. Радари има и во Пехчево, на Русинска раскрсница кај Берово, на магистралниот пат кај Страцин... Почитувајте ги дозволените брзини на движење на автопатите Скопје - Куманово кај Агино Село, кај Бунарџик, не возете пребрзо кон Демир Капија... Впрочем, внимавајте, пред се', за својата безбедност и за безбедноста на оние што патуваат покрај вас.