Грците добро се стегнаа, Европа е задоволна

Според првиот човек на ЕЦБ, Трише, п��ограмата за консолидирање на буџетот ветува многу

Европската централна банка е задоволна од развојот на ситуацијата во Грција, каде што „многу ветува“ одвивањето на програмата за консолидирање на буџетот. Ова го изјави претседателот на банката, Жан-Клод Трише.

„Во Грција има знаци дека буџет��ката консолидација напредува добро во првите пет месеци од 2010 година“, истакна Трише.

Според него, сегашните промени се во корелација со структурните реформи и дозволуваат обновување на довербата. Тој додаде дека и други држави разработуваат мерки за консолидирање на буџетот, но не посочи кои се тие држави.

Шефот на банката направи паралела меѓу финансиската криза и еколошката катастрофа во Мексиканскиот Залив и, според него, можат да се извлечат многу заеднички поуки за управување во кризни ситуации, создавањето стимул за развој на приватен бизнис и регулирање на глобалната економија и неопходност од координирање на заемните напори на политичко ниво.

И грчкиот премиер Јоргос Папандреу го дели мислењето дека состојбите во неговата држава се подобруваат, а оти големите опасности останале зад неа. „Грција е на пат кон економско и фискално нормализирање, оставајќи зад себе големи опасности“, изјави Папандреу во Триполи, во обраќањето на Регионалниот економски и социјален комитет на својата партија ПАСОК. Папандреу истакна дека Грција е на патот на промените, со план, програма и одлучност.

Коментирајќи ги неодамнешните гласишта за банкрот на Грција и напуштање на еврозоната, премиерот оцени дека тие се неосновани, додавајќи дека дури и се ширеле приказни дека бродовите носат хартија за печатење драхми. Папандреу рече дека овие гласишта не само што се апсурдни, туку и многу опасни, зашто без причина ги вознемируваат граѓаните.

Дека работите во Грција одат кон подобро, доказ се и неодамна објавените податоци на грчкото министерство за финансии дека во првите пет месеци од годинава земјата успеала, повеќе од предвиденото, да го намали буџетскиот дефицит.

Во соопштението од министерството за финансии се наведува дека во периодот од јануари до мај буџетскиот дефицит изнесувал 8,97 милијарди евра, а во истиот период минатата година 14,65 милијарди евра. Дефицитот во првите пет месеци бил намален за 38,8 проценти, иако било предвидено да биде намален за 35,1 отсто.

Грчкиот институт за статистика објави и дека стапката на невработеност во март изнесувала 11,6 отсто, додека во февруари 12,1 проценти, односно во март стапката на невработеност била намалена за 26.500 лица. (Ек.Р.)