Оријана Фалачи

Тестаментот го подели семејството

Се' што имала во животот Оријана по смртта му оставила на својот внук од сестра, Едоардо Переци. Со тој потег и' го задала последниот удар на сестрата Паола Фалачи, која сосема ја исфрлила од тестаментот

Иако од смртта на најпознатата и најгласна италијанска писателка и новинарка Оријана Фалачи ми��аа речиси четири години, таа, нејзината оставина и нејзината животна приказна се' уште ги вознемирува духовите. Но, овој пат не во редовите на светските водачи, кои за време на својот живот ги провоцираше, ниту исламскиот народ, кој без пардон го навредуваше, туку во сопственото семејство, кое поради нејзиното наследство денес води судска битка.

Се' што имала во животот Оријана по смртта му има оставено на својот внук од сестра, Едоардо Переци, 44-годишен моден менаџер. Со тој потег и' го задала последниот удар на сестрата Паола Фалачи, која сосема ја исфрлила од тестаментот, а чиј син засекогаш го обезбедила. Затоа Едоардо, неговата мајка, денес го нарекува „мојот бивши син“. Повредена и лута, таа се обидува да го оспори тестаментот на Оријана, не сакајќи да се помири со фактот дека сестра и' не и' оставила ама баш ништо.

Но, кога малку подлабоко ќе се навлезе во оваа семејна драма, сосема е јасно зошто таа чудесна и своеглава жена не и' оставила ништо на својата сестра, освен дозволата за време на нејзиниот живот да престојува на имотот во Тоскана, вреден неколку милиони евра. Како еден од последните удари и разочарувања што ги доживеала Оријана од Паола, Едоардо вели дека е оној кога во 2003 година писателката им соопштила дека има рак. Тој вели дека и денес тешко се справува со реакцијата на својата мајка. „Седевме во нејзината куќа во Кјанти и Оријана ни кажа дека има рак. Ја праша мајка ми дали може да оди со неа во Њујорк, да ја испрати на лечење. Мајка ми рече: ’И јас сум болна и имам многу работа‘. Тоа беше ужасен разговор, кој потоа продолжи. Мајка ми ја обвини тетка ми дека пишувала книги за фашисти и по неколку дена едноставно престанаа да разговараат“, се присетува Переци. На новинарско прашање неодамна дали двете сестри навистина се мразеле, одговорил: „Мајка ми веќе не сакаше да ја види Оријана. Во болница се појави кога тетка ми веќе падна во кома. За неа има кажано дека е како Леди Макбет“.

Но, затоа тој со својата тетка секогаш имал особено близок однос и открива дека во неа пронашол мајчинска фигура. Со оглед на тоа дека Оријана со години живеела во Њујорк, Едоардо, кој патувал таму, барем еднаш месечно поради работа, секогаш преспивал кај неа. Разговарале за се', се допишувале и еден на друг си се обраќале за проблемите. „Беше многу врзана за мене и беше многу великодушна“, открива Едоардо, кој заедно со станот што го имала Оријана во Њујорк и имотите во Италија добил и цел куп хартии што го отсликуваат нејзиниот живот.

Книгата за своите предци, „Шапка полна цреши“, што ја пишувала Оријана цели десет години, се' до терористичките напади на 11 септември во Њујорк, Переци ја објавил две години по нејзината смрт и покрај противењето на својата мајка. Таа гласно протестирала во италијанските медиуми, не сакајќи „семејното ѓубре“ да се изнесува во јавноста. Но, Едоардо тврди дека постапил според желбите на Оријана, која пред смртта внела уште некои последни измени. Оријана, која се лечела во Њујорк, сакала да умре во Италија, во својот дом во Кјанти, каде што била најсреќна. Но, никогаш не стигнала дотаму.

„Ме повика еден ден и ми рече дека морам да почнам да го организирам погребот. Ми рече дека мора итно да дојдам во Њујорк. Но, не можев, зашто тогаш бев среде работа во Венеција. Тогаш ми одговори: ’Идиоте, зар не разбираш дека умирам‘“,се присетува Переци.

И имала право, кога пристигнал, таа веќе била на крајот на силите. Со приватен авион ја префрлил во Фиренца, каде што го замолила да купи шише шампањско за да го прослават нејзиното враќање дома.

Но, не стигнала до Кјанти. Починала во Фиренца, на 16 септември 2006 година, во 78. година од животот. Едоардо денес пребира по нејзините сеќавања, а со мајката комуницира само преку адвокатите.