БИЛИ АЈДОЛ

Панк рок-легендата ќе грми на 20 јуни на Кале

Легендарниот Били Ајдол доаѓа во Скопје на 20 јуни, во рамките на својата европска турнеја, со посредство на „Авалон продукција“, која по Боб Дилан најавува уште еден спектакуларен концерт, закажан на отворено, на просторот на скопско Кале. Ајдол ќе пристигне во земјава со 40-члена екипа, три автобуси и еден камион техничка опрема. „Сите знаеме кој е и што е Били Ајдол. Овој концерт е продолжение на една серија убави концерти - Лени Кравиц, Сантана, Боб Дилан... Воодушевен сум од локацијата и навистина ми е жал што досега не сме ја откриле“, изјави Даниел Милошоски на вчерашната прес-конференција во клубот „Маракана“.

Ајдол ќе настапи на бина со димензии 20 Х 14, а како негова предгрупа, односно за загревање на атмосферата ќе бидат задолжени членовите на „Психомодо поп“, кои ќе настапат со 60-минутно бест-оф шоу.

Веднаш по Скопје, Ајдол, кој е препознатлив по хитовите како „White weeding“, „Flesh for fantasy“, „Sweet sixteen“, „Speed“, „LA Woman“, „Dancing with myself“... ќе настапи во Белград, а потоа (ден подоцна) го очекува и настап на „In music“ фестивалот во Загреб.

Организаторите велат дека се' е подготвено за вистински рок спектакл на Кале. Влезниците се веќе пуштени во продажба и чинат 1.000 ден., односно 1.500 ден. за фан пит места, кои се со ограничен број.

(К.Ш.)