Колку бинга ќе има во администрацијата

Европската комисија инсистира наместо партиски кадри, да се ангажираат стручни и професионални луѓе

Светлана Унковска


Владата вчера ги отфрли обвинувањата дека врши партизација на државната администрација со нови 30 илјади вработувања и дека нивните статуси на привремено вработени ќе биде трансформиран во постојани. Ваквата реакција доаѓа откако опозициската СДСМ обелодени дека Владата планира со новите вработување да изврши целосна партизација на државната и на јавната администрација. Државните јасли, според социјалдемократите, уште повеќе ќе натежнат со армија нововработени партиски кадри, со тоа што за два месеца привремено вработените ќе добијат постојано вработување.

Но, изјавата на владиниот портпарол, Мартин Мартиновски, дека ќе нема трансформација на привремени во постојани вработување е спротивна на она што го изјави деновиве премиерот Никола Груевски. Откако опозицијата излезе со обвинувањето дека власта ја партизира администрацијата со нови 30 илјади лица, Груевски ова на некој начин и самиот го потврди, објаснувајќи дека на тоа инсистирале од Европската комисија и дека станува збор за усогласување со нивните барања. Оваа негова изјава во јавноста предизвика бурни реакции поради тоа што укажувањето на ЕК да се реши проблемот со привремените вработувања премиерот Груевски го искористил за вработување на партиски кадри. Вчера, сепак, портпаролот Мартиновски излезе со малку поинакви објаснувања во кое тој негира дека станува збор на нови работни места во администрацијата, туку за вработување лица чии договори се обновуваат со години.

„Станува збор за пет илјади вработувања што датираат од поодамна, кои голем дел се од времето на СДСМ и очигледно е дека за овие работни места постои потреба во институциите штом постојат толку години“, нагласи Мартиновски, додавајќи дека трансформацијата на тие договори ќе се одвива согласно со законските процедури преку јавен конкурс на кој ќе може да конкурира секој што е заинтересиран.

„Тоа значи дека лицата што моментално се ангажирани нема автоматски да добијат постојано вработување, туку ќе бидат вработени, тие што ќе покажат најдобри резултати на конкурсот“, дополни Мартиновски. Според него, Владата ја спроведува реформата во администрацијата и овој потег претставува дел барањата на Европската комисија за решавање на нивниот статус.

Европската комисија, која во секој извештај наведува на високата партизираност во администрацијата, инсистира наместо партиски кадри, да се ангажираат луѓе што се стручни и професионални во оваа област. Вработувањето во овој сектор, кој е доста значаен, чувствителен и важен сектор преку кој се остваруваат правата на граѓаните со години се пополнува со кадри од партијата што моментално е на власт. Како што се менуваа партиите, така се' повеќе се натрупуваше администрацијата со кадри, кои исклучиво имаа партиски квалификации. Вработувањата по партиски клуч на си��е досегашни владејачки гарнитури беше метод на задоволувањето на апетити на партиските војници и манипулација со гласачкото тело.

Професорот по трудово право, Осман Кадриу, забележува дека и покрај тоа што се повредуваат уставните одредби, кои забрануваат дискриминација по политичка припадност, односно дека никој не смее да има придобивки поради членство на одредена партија, сепак, државниот сектор ни е преполн со партиски војници.

„Ние дојдовме во состојба кога немаме обучени и професионални кадри и тоа силно се одразува врз ефикасноста на државниот апарат, но и врз правата на граѓаните. Власта постапува дијаметрално спротивно од она на што и' се укажува и верувам дека во ниту една друга земја не се вработуваат лица што седат дома и примаат плата. Тоа е спротивно на законите и каков е тој работен однос ако само фигурира на платен список, а ниту знаат каде работат и каде им е работното место“, вели Кадриу. Според него, товарот на превработеноста на државни јасли ќе предизвика потреба од постојани корекции во буџетот и ребалансот ќе стане дежурна тема во текот на годината. (Св.У.)