Портокалова револуција и во судството

Опозицијата тврди дека власта се пресметува со неистомислениците. Седуммина пратеници добиле пресуди за клевета

Оливера Војновска


„Судството е продолжена рака на власта што го користи за да се пресметува со политичките неистомисленици. Седуммина пратеници од опозицијата имаат пресуди за клевета, со што овој собраниски состав е рекордер за вакви судски пресуди“. Овој податок од собраниската говорница го изнесе пратеникот од НСДП Горан Мисовски и го повика претседателот на Судскиот совет Васил Грчев (кој вчера во Собранието го бранеше годишниот извештај на оваа институција), да проговори за „класичен упад на портокаловата револуција во судството“. Тој уште кажа дека судиите говорат за портокалови телефони и треперат не дај Боже да не се замерат со министерот за правда Михајло Маневски и со пратеничката од ВМРО-ДПМНЕ Благородна Дулиќ“.

Мисовски заедно со пратениците од СДСМ Радмила Шеќеринска и Горан Минчев имаат судска пресуда за спорот што пред две години го поведе лидерот на СДУ, Лазе Еленовски. Тој ги тужеше поради снимката од партискиот состанок на НСДП од 30 април 2008 година, што ја објави СДСМ, а во која има негова изјава дека премиерот Никола Груевски во Букурешт отишол со предлогот Република Македонија-Скопје. Пресуди за клевета имаат и експремиерот Владо Бучковски, потпретседателот на Собранието Јани Макрадули и пратеничката Весна Бендевска. Сепак, надвор од собраниската сала Мисовски не беше сигурен дали вакви пресуди имаат шест или седум опозициски пратеници и вели дека можеби во дискусијата направил превид.

Министерот за правда вчера беше најспомнуваната личност во дебатата за извештајот на СС. Пратеникот Бучковски очекувал дека Грчев ќе собере сили и во настапот пред Собранието „ќе ги одбрани сите судии што имаат закани од министерот за неправда“. Побара одговор од Грчев за тоа дали е точно дека член на Судскиот совет од Штип издејствувал неговата ќерка да стане судија. За Бучковски е несфатливо како може новоизбраниот член на СС Бранко Ушковски да биде дел од Комисијата што ги разрешува судиите. Исто така, упати забелешки за непочитувањето на презумпцијата на невиност при спектакуларните апсења на видни личности. Експремиерот го праша Грчев дали има намера да застане зад судиите и да го брани нивниот интегритет или, пак, ќе го брани Маневски.

Грчев нема информации дека кој било член на СС има вработено свои блиски роднини во судовите. За Ушковски рече дека во Комисијата дошол на местото на колегата што заминал во пензија. Според него, се предимензионира улогата на министерот во СС и се претерува во квалификациите дека СС е заложник на Маневски“. Сепак, тој призна дека Судскиот совет не е имун на одредени ургенции што доаѓаат од секаде и од која било структура. „Проблемот не е во тоа дали Судскиот совет има притисоци, туку кога судиите ќе подлегнат на такви притисоци. Тоа е индивидуален пристап на самиот поединец при вршењето на функцијата“, рече Грчев.

Пратеникот од Демократскиот сојуз, Павле Трајанов, е разочаран поради тоа што 20 години говориме за реформи во судството, а тоа станува се' позависно од партиски и бизнис-влијанија. „Состојбите во судството се' уште не се на такво ниво на кое сакаме да бидат. Тешко се доаѓа до правда ако си обичен граѓанин“, со жалење констатира Трајанов. Тој потенцира дека отсекогаш се залагал министерот за правда да не биде член на Судскиот совет. „За ова сите партии треба да имаат единствен став, а предлогот може да го иницира Уставната комисија“, вели Трајанов.

Макрадули го потсети претседателот на СС дека земјата постојано трпи критики поради судството, нагласувајќи дека странците знаат оти се носат пресуди под притисок. Алудирајќи на слоганот за прославата на 20- годишнината на ВМРО-ДПМНЕ „За татковината се работи“, тој го праша Грчев, „ако се работи за татковината, што направил тој за да има поинаква слика за судството“. И Макрадули како пример за „некомпетентни кадри „дојдени на функција само поради партиска заслуга“ го посочи Ушковски, додавајќи дека тој немал ниту 30 секунди минати во судството!

Според пратеничката од ВМРО-ДПМНЕ Дулиќ, во судството не цветаат рози, но работите не се ниту толку црни како што некој сака да ги претстави. „ За интегритетот на судиите и судството треба да се грижат самите судии и Здружението на судии“, смета Дулиќ и ги повика опозиционерите: „Оставете го Маневски на мира!“

Пратеникот Емилијан Станковиќ од СДСМ пријателски го посоветува Грчев дека тоа што никој од пратениците на ВМРО-ДПМНЕ не стана да го брани, треба да го сфати како знак дека ќе биде за еднократна употреба.

Претседателот на Судскиот совет во својот рапорт пред парламентот презентираше, главно, технички податоци за работата на институцијата. Грчев информираше дека минатата година Судскиот совет првпат избирал судии од кандидатите од првата генерација што ја заврши Академијата за обука на судии. Притоа соопшти дека се избрани вкупно 43 судии, од кои 21 судија во основните судови.