Претходен број

Нови трауми за средношколците

Никој не знае дали тестови ќе има секоја година и колку предмети ќе се полагаат

Жаклина Хаџи-Зафирова

Само што здивнаа од траумите кои ги пребродија со државната матура, средношколците сега повторно ги чекаат месеци на неизвесност, откако на почетокот на учебната година нивните наставници им ги најавија новите тестирања на крајот на секоја учебна година. Новите, таканаречени стандардизирани тестови со кои ќе се проверува колку реално се оценети учениците ги опфаќаат и основците, кои, исто така, ќе треба да го понесат товарот на реформите.

Веќе неколку дена траат средношколските протести, кои вчера беа поддржани и од основците кои протестираа пред ресорното Министерство, збунети од она што ги чека. Различните верзии околу вистината за екстерната проверка на знаење целосно ги збунија учениците кои не знаат дали ќе мора да ги полагаат овие тестови секоја година, колку предмети ќе се полагаат и кој ќе ги изработува тестовите. Слично како и со државната матура кога учениците до последен момент не знаеја како ќе ја полагаат.

„Не сакаме тестови“, извикуваа вчера основците кои уште во раните утрински часови дојдоа пред Министерството за образование и наука, барајќи некој да им ги објасни новите законски измени со кои се предвидени таканаречените стандардизирани тестови.

Основците, како и средношколците најавија дека ќе протестираат се' додека не им го појаснат значењето на тестовите кои сметаат дека се излишни. Според нив, новите тестови се непотребни, бидејќи мислат дека се доволно оценети во текот на учебната година и им веруваат на своите наставници, за кои велат дека реално ги оценуваат.

Во Министерството за образование и наука немаат единствен став околу тоа како ќе се полагаат новите тестови. Првично беше најавено дека учениците ќе полагаат еден од десетината предмети кои ги изучуваат во текот на годината и дека тоа ќе се однесува за сите учебни години од четврто до осмо одделение и за сите средношколци.

Но, завчера стигнаа поинакви најави од Министерството, од каде беа категорични дека матурантите нема да полагаат тестови и дека е можно да полагаат два предмета, а не вкупно 12, од што се плашеа средношколците. Сепак, во Министерството велат дека ќе треба да се изгради единствен став за да нема забуни во јавноста. Официјални лица тврдат дека законот се однесува на сите и никој не би требало да биде заобиколен со тестовите.

„Се врши прове��ка на знаењето по еден наставен предмет од одреден наставник. Сите ученици ќе полагаат по еден предмет кој ќе се одбере компјутерски. Ќе има екстерна проверка за знаењето во една паралелка за секој наставник“, најави раководителот за основно и средно образование, Љупчо Спасовски, презентирајќи ги новините во законот. Тој појасни дека проверката е со цел да се провери квалитетот на оценувањето на наставниците. Тој вели дека со тестовите сакаат да се види реалноста во оценувањето на наставниците.

Затоа, наставниците ќе бидат наградувани, односно казнувани во зависност од оценката што ќе ја добие ученикот. Оние наставници кај чии предмети ќе има најмали отстапувања од оценката ќе добијат за 15 отсто повисока плата. Оние кај кои ќе бидат забележани најголеми отстапувања ќе бидат казнети со 10 отсто помала плата.