Двајца Јапонци и Американец го добија Нобел за физика
Макото Кобајаши, Тошихиде Маскава и Јоичиро Намбу објасниjа зошто универзумот е од материја, а не од антиматерија
СТОКХОЛМ - Двајца јапонски научници и Американец, роден во Токио, ја добија Нобеловата награда за физика за 2008 година за откритија на субатомски честички, соопшти вчера Комитетот за доделување на наградите.
Нобеловиот комитет ги награди Јоичиро Намбу, американски државјанин роден во Токио, и Макото Кобајаши и Тошихиде Маскава од Јапонија за нивната одделна работа што помогна да се објасни зошто универзумот е составен главно од материја, а не од антиматерија, преку процес познат како нарушена симетрија. Тие помогнаа да се сфати постоењето и однесувањето на најмалите честички познати како кваркови.
Професорот Намбу од Универзитетот во Чикаго е награден за откритието на механизмот на спонтано кршење на симетријата. Тоа помага да се разбере основата на стандардниот модел на физиката, што обединува три од четирите фундаментални сили на природата: силна, слаба и електромагнетска, оставајќи ја гравитациската. Намбу, исто така, влијаеше на развојот на квантната хромодинамика, теорија што опишува некои интеракции меѓу протоните и неутроните, кои ги сочинуваат атомите, и кварковите кои ги сочинуваат протоните и неутроните.
Намбу дели половина од престижната награда од 10 милиони шведски круни (1,4 милиони долари) со Кобајаши од јапонската Организација за истражување на акцелератори на висока енергија, и со Маскава од Универзитетот во Кјото. Кобајаши и Маскава предложија шест вида кваркови, а сите подоцна беа откриени во физичките експерименти со високоенергетски честички.
„Фактот дека нашиот свет не се однесува совршено симетрично се должи на отстапувањата од симетријата на микроскопско ниво“, соопшти Комитетот. Таа нарушена симетрија овозможува честичките на материјата бројно да ги надминат честичките на антиматеријата. (Ројтерс)
|
