Нема веќе пет картички во пет банки
Банките ги заоструваат критериумите за одобрување кредит или кредитна картичка, а се топат и минусите
Нина Нинеска-Фиданоска
Станува се' потешко да се добие кредит од банка. Се топат и минусите на тековните сметки. Граѓаните се жалат дека добивањето кредит или кредитна картичка веќе е многу понеизвесно отколку претходно. Дел од нив реагираат и дека банките им ги намалиле дозволените пречекорувања на тековните сметки, односно на дебитните картички преку кои ја примаат својата плата.
Некои од банкарите признаваат дека критериумите за добивање кредит или одобрување минус на тековна сметка сега стриктно се почитуваат. Нема веќе гледање низ прсти на клиентите. Во одделни банки условите за заем или се веќе заострени или, пак, ќе се случи тоа во многу скоро време. Речиси е сигурно и дека ќе дојде до зголемување на каматните стапки. Други банкари, пак, велат дека кај нив нема „рестрикции“ и дека тие продолжуваат со истото темпо на кредитирање како и досега.
Најмногу од поплаките се однесуваат на намалување на дозволените пречекорувања на дебитните картички преку кои се прима плата.
„На мојата дебитна картичка имав дозволен минус од две плати, односно околу 32.000 денари. Тој минус преку ноќ се намали на 22.000 денари. Објаснувањето што го добив на шалтер беше дека банката ми го намалила кредитниот лимит, иако се' уште ја земам истата плата. За оваа промена не бев информирана“, вели една анонимна скопјанка.
Главна причина за ваквото затегање е светската финансиска криза, што во цел свет ја зголеми недовербата за доделување кредити.
Ѓорги Јанчевски, прв човек на НЛБ Тутунска банка, објаснува дека во оваа банка засега не е заострено кредитирањето, но сигурно ќе се случи тоа многу скоро. Во банката ќе се зголемуваат и каматите на кредитите. „Мора да се дејствува превентивно и да се оди поконзервативно во кредитната активност. Финансиската криза е светски процес и иако сме на периферија, сепак, цунамито може да дојде и кај нас. Кога граѓаните имаат пет картички во пет банки, тоа значи дека задолженоста е навистина голема. Исто така, банките не може да даваат долгорочни пласмани кога им се краткорочни изворите на средства“, објаснува Јанчевски.
Според него, нормално е да се очекува намалување на кредитирањето, во услови кога во светски рамки практично снемува пари. Многу е битен и психолошкиот фактор, во смисла дали и на кого се одобруваат кредити. Очигле��но е дека пред да избие кризата, некои банки во светот беа многу флексибилни во давањето заеми, но затоа сега ќе биде неопходен конзервативен пристап. „Кризата мора да се почувствува и кај нас, бидејќи ќе се намалат кредитните линии од странство“, смета Јанчевски.
Во Комерцијална банка, пак, велат дека оваа банка ќе продолжи со истата динамика на кредитирање како и досега. „Каква што ни беше политиката на кредитирање досега, така и ќе продолжи. Нема промени“, изјави Маја Стевковска-Штериева, финансиски директор на Комерцијална банка.
Во Стопанска банка објаснуваат дека во оваа банка нема менување или заострување на критериумите за добивање кредит, но дека тие сега стриктно се почитуваат. „Банките при одобрување одреден кредит секогаш прифаќаат одреден ризик. Ги следиме движењата на светските берзи. Моментно нема заострување на критериумите, но стриктно ги почитуваме. Брзината на одобрување на кредитите не е нарушена, па дури перманентно се води сметка таа да се зголеми и да се подобри услугата. Ризикот за банките треба особено да се намали со основањето на кредитното биро, кое се очекува до крајот на годинава“, вели Глигор Бишев, прв човек на Стопанска банка. |
