Канчелара поведе на Тур де Франс

Швајцарецот Фабијан Канчелара прв ја облече жолтата маичка како победник во прологот во Ротердам со кој почна велосипедската трка Тур де Франс. Возачот на тимот на Колумбија, Тони Мартин, беше во водство во најголемиот дел од првата етапа долга 8,9 км, односно до моментот кога светскиот шампион на хронометар Канчелара од Саксо банк изби на чело, финиширајќи по точно десет минути. Младиот Германец Мартин заостана десет секунди.

Британецот Дејвид Милар од Гармин транзишнс влезе трет низ целта со заостанување од 20 сек., а две секунди по него етапата ја заврши седумкратниот победник на Тур де Франс, Американецот Ленс Армстронг од Радиошек. Легендарниот тексашанец го остави зад себе пет секунди својот лут ривал и бранител на трофејот, Шпанецот Алберто Контадор од Астана.

„Оваа победа навистина не' покренува. Таа покажува дека јас сум подготвен, но и тимот исто така“, изјави Канчелара.

Британецот Бредли Вигинс, четврти во вкупниот поредок минатата година, беше едно од најголемите разочарувања на денот, завршувајќи 77. и со заостанување од 56 сек. Лани второпласираниот севкупно, Луксембуржанецот Енди Шлек од Саксо банк, вртеше незадоволно со главата додека влегуваше во целта со време од 11:09 мин., 47 сек. послабо од тоа на Армстронг и 42 сек. од Контадор.