Крај на мундијалските фрустрации на „фуријата“

Фудбалската репрезентација на Шпанија го победи Парагвај со 1:0 и по четири неуспешни обиди, конечно, мина во полуфинале на Светските првенства. Шпанските медиуми еуфорични по пласманот на „црвената фурија“ во големата мундијалска четворка во Јужна Африка, момент што земјата желно го очекуваше 60 години. Последното полуфинале на едно СП, Шпанците го одиграа во 1950 година , но тогаш се играше финална група, а не класичен меч за пласман во финале.

„Сите Шпанци живееја за овој ден“, тврди тиражна „Марка“ додавајќи дека на генерации Шпанци националниот тим им приредуваше разочарувања и фрустрации, но сега е ставен крај на тоа. Под насловот „Крв, пот и победа“ дневникот „Ас“ коментира дека Шпанците конечно научија како се победува со неубава игра во дуели во кои одлучува една топка. Во сите насловни страници во шпанските весници се објавени фотографии на два хероја - голманот Икер Касилјас и стрелецот на победничкиот гол, Давид Вилја.

Нешто помалку еуфоричен е „АБЦ“ кој тврди дека Шпанија не одигра добро против Парагвај и се' уште не ја демонстрира играта со која стана европски првак во Австрија и Швајцарија.

„Шпанската игра на куси и точни додавања не функционираше. Игравме бавно и без идеја, а така нема да ја победиме Германија“, тврди „АБЦ“ кој и во оваа пригода не пропушти да нотира уште една слаба партија на Фернандо Торес.

Во полуфиналето Шпанија ќе игра со Германија. Во тој контекст шпанските медиуми ги пренесуваат тврдењата на селекторот Висенте дел Боске.

„Кога можевме да ги победиме во финалето на Европското првенство во 2008 година, можеме да ги победиме и тука, на Светското првенство, во Јужна Африка“.