Што прави Али Ахмети

Лидерот на ДУИ е убеден дека Груевски не сака да го реши името

Светлана Унковска


Иако одамна стана банално да се поставува прашањето што се случува со партијата на Али Ахмети и каде е воопшто лидерот на интегративците, сепак, тишината што се шири околу ДУИ е премногу гласна за да не се забележи.

Каде е, всушност, лидерот на партијата на Албанците во власта? Тоа што повремено излегува од анонимност за да каже дека не излегува од Владата и покрај се', не може да биде одраз на дејствување на рамноправен коалициски партнер во власта, кој ја има одговорноста пред граѓаните за се' што се случува.

Во вжештениот политички момент кога неизвесноста околу решавањето на спорот со името и со тоа евроатлантските интеграции е се' појасно дека се ставени под големо прашање, Ахмети отсуството го оправдува со тоа што вели дека не сака да му биде алиби на премиерот Никола Груевски да не го реши спорот со Грција.

Убеден е дека неговиот партнер не сакал да го реши спорот, туку се обидувал да и' ја префрли одговорноста на ДУИ. Со тоа отворено потврдува дека партнерството во власта им оди во спротивни насоки и признава дека меѓусебното нетрпение е на критично ниво. Скоро со исти реченици деновиве премиерот Груевски повторно негира дека односите во коалицијата се нарушени и дека со ДУИ имаат редовна комуникација, при што некои прашања дури биле и завршени. Но, кога беше последната средба Груевски - Ахмети?

Позицијата на ДУИ во власта, како што оценува Љулзим Хазири од Асоцијацијата за демократска иницијатива е на границата меѓу издржливоста и невозможноста.

„Ако се вели дека не се попушта за името и со тоа не се прифаќаат ниту евроинтеграциите и членството во НАТО, по ова ДУИ треба да најде излез од ваквата ситуација затоа што по партијата ќе влезе во уште подлабока апатија и нема да биде во корелација со барањата на граѓаните, со што целосно ќе ја изгуби довербата“, вели Хазири. И покрај тоа што раководството и членството на партијата се прекршува околу овој став, Ахмети упорно вели „не“ за заминувањето од власта, за што притиска и самата меѓународна заедница. За нов рок до кога ќе чекаат ВМРО-ДПМНЕ да го реши спорот со името го поставиле самитот на НАТО во ноември, а со особено вниманието ќе ги следеле и пораките за Македонија што се очекуваат да произлезат од состанокот „ЕУ - Западен Балкан“ во Сараево. Што ќе се случува потоа, дали ќе следуваат повторно пролонгирање на рокови или ќе преземаат радикални чекори, не откриваат.

Засега, велат партиски извори, нема да дозволат да потпаднат на сценариото што им го прави ВМРО-ДПМНЕ. „Ако мислат дека со провокациите ќе не' изнервираат за да не' натераат да излеземе од власта и да испровоцираат предвремени избори, тоа нема да им успее. Можеби изгледа дека сме многу дефанзивни и пасивизирани, но тоа е затоа што не сакаме да влеземе во нивната шема и со тоа да се оправдаат за нерешавањето на спорот со името. Знаеме дека сме цел, но тоа е единствениот начин“, вели нашиот и��вор.

Тој додава и дека Ахмети, сепак, ги збива партиските редови и затоа во иднина претседателството на ДУИ секој викенд задолжително ќе заседава и ќе ги преиспитува вкупните состојби.

Останува неизвесноста и околу исполнувањето на барањата, кои Ахмети пред само еден месец се одважи и храбро му ги испорача на премиерот Груевски. За барањата за запирање на Хашките случаи, за Сопот и обештетување на поранешните борци на ОНА, очекувањата и во редовите на самата ДУИ дека нешто ќе се реализира се минимални.

Овие барања на лидерот на интегративците се отфрлени затоа што, како што велат извори од партијата од нивниот партнер, од ВМРО-ДПМНЕ било порачано дека тешко би можело да се направи нешто, бидејќи Сопот и Хашките случаи се предмети кои се во надлежност на судството во чија независност не сакаат да навлегуваат. Не се очекува ниту во скоро време да се донесе решение за статусот на борците на ОНА, а како причина се наведува неодамнешната потврдена пресуда на Јохан Тарчуловски од Хашкиот трибунал. Не сакале да вршат притисоци за ова барање, бидејќи во таквата атмосфера на зовриени страсти не сакале да долеваат масло на огнот. (Св.У.)