Прекинаа ископувањата на Хераклеја - нема пари

Одлуката е донесена речиси преку ноќ. „Рецесија е“, вели Паско Кузман

Битола - Прекинаа археолошките истражувања на античкиот локалитет Хераклеја Линкесис крај Битола. Наеднаш финансиската криза стана причина за стопирање на ископувањата, иако се најавуваше работите да се одвиваат и во текот на летото.

Паско Кузман, директор на Управата за заштита на културното наследство на Македонија, потврдува дека ископувањата запреле на Хераклеја, но дека тоа не е исклучок, туку работите се стопирани и на други локалитети во државата онаму каде што само се истражувало, но не и на капиталните проекти.

Истражувањата на Хераклеја започнаа во втората половина на март за целосно да се прекине со работа на 1 јуни. Тогаш ангажирани беа дваесеттина стручни лица и над двеста работници, а се најавуваше дека за годинашните истражувања се обезбедени 30 милиони денари. Археолозите имаа цел да ги доистражат оние места каде што лани започнаа со работа, но, сепак, тоа да биде во оградениот дел на локалитетот.

Сега за изненадување на јавноста, но најмногу за изненадување на ангажираните работници на кои дневницата од 400 денари им беше единствената егзистенција, работите во Хераклеја запреа.

„Проблем е што нема пари. Не е тоа дека ан блок одеднаш ги прекинавме работите и останавме со прстот во уста. Туку, ги прекинавме истражувањата онаму каде што немаше потреба натаму да се брзаме. Треба да бидеме и во контекст со состојбата во земјава, нели е рецесија. Но, да се знае дека работите продолжуваат на главните проекти“, вели Кузман.

Според него, досега за ископувањата во Хераклеја се потрошени околу 50 милиони денари со планови доколку се продолжи со истражување на есен да се потрошат уште 30 милиони денари.

Кузман ги демантира гласиштата дека ископувањата во Хераклеја запреа, бидејќи во изминатите месеци не се наиде на ниту еден значаен артефакт, иако потврдува дека за разлика од останатите локалитети во државата каде што оваа сезона беа откриени вредни артефакти, тоа не се случи и во Хераклеа.

„Нема ништо ексклузивно што се најде во Хераклеја. Но, онаму каде што се работи на архитектура на откривање на урбана средина помалку може да се очекува на такви наоди. За разлика од тоа кога се работи на некрополи на гробови, тогаш може да се надеваме на ексклузивни предмети. Меѓутоа, за нас археолозите и керамиката значи успешна берба“, објаснува Кузман.

Според него, со работа ќе се продолжи единствено на Плаошник и на скопското Кале. (А.Б.)