Содерлинг, конечно, го победи Федерер!

Јелена Јанковиќ е првата полуфиналистка на Ролан Гарос откако ја совлада Шведова со 2:0 (7:5, 6:4)

Швеѓанецот Робин Содерлинг во четврт-финалето на Ролан Гарос направи вистински подвиг совладувајќи го минатогодишниот шампион и првиот светски тениски рекет, Роже Федерер во четири сета со 3:6, 6:3, 7:5 и 6:4.

На тој начин Содерлинг на најубав можен начин му се одмазди на Швајцарецот за минатогодишниот пораз во финалето на гренд-слемот во Париз. На Швеѓанецот му беа потребни 13 мечеви најпосле да го победи најдобриот светски тенисер. Одбра убав момент, четврт-финале на Ролан Гарос.

Робин Содерлинг беше воодушевен со својата игра откако за првпат го совлада Федерер на еден голем турнир, попатно прекинувајќи ја неверојатната серија на швајцарскиот ас од 23. полуфиналиња на гренд-слем турнирите во низа.

„Беше фантастично. Навистина обожавам да играм на овој терен. Откако ќе излезам чувствувам неверојатна самодоверба. Од меч во меч сум се' подобар, а против Федерер одиграв одлично. Ролан Гарос дефинитивно е мојот омилен гренд-слем турнир, а да одиграш така добро и да го победиш првиот светски рекет, навистина не можам да барам повеќе!“, изјави Содерлинг.

Роже Федерер првпат по 2004 година нема да го види барем полуфиналето на Ролан Гарос. Таа година загуби од Бразилецот Густаво Куертен во 3. коло. „Веројатно Робин го одигра најдобриот меч во кариерата. Дефинитивно играше подобро во однос на минатата година кога овде го победи Рафаел Надал“, изјави Федерер по поразот, кој може да го симне и од првото место на АТП-листата во случај Надал да го освои Париз.

Робин Содерлинг за свое второ едноподруго финале во Ролан Гарос ќе игра против расположениот Чех Томаш Бердих кој во второто четврт-финале просто го прегази 11. носител, Русинот Михаил Јужни со 6:3, 6:1 и 6:2, со што го забележа својот најголем успех на Ролан Гарос.