Лаги и шпекулации на газда Велија за МПМ

Идејата на Рамковски е да се создаде привид дека сите сме исти и дека сите работиме на нелегален начин, што е една голема невистина

„Одлучно и категорично ги отфрламе инсинуациите изнесени на сметка на компанијата ’Медија принт Македонија‘ во прилозите на медиумите под контрола на газда Велија Рамковски. Ниту едно евро од нашата компанија не е излезено надвор од границите на земјата на нелегален начин, ’Медија принт Македонија‘ остро ги демантира наводите изнесени на А1 телевизија и во весникот ’Време‘ за, наводно, тајно префрлање големи суми пари од Скопје во Виена.

Целосно ни е јасна мотивацијата за ваквите подметнувања што треба да го свртат вниманието на јавноста од сомнежите за сторен криминал во фирмите на ’Перо Наков‘ б.б.. Јасно ни е дека идејата е да се создаде привид дека сите сме исти и дека сите работиме на нелегален начин, што е една голема невистина. Убедени сме дека јавноста нема да влезе во таквата стапица на Рамковски.

Поврзувањето на името на Срѓан Керим со овие невистини е депласирано и апсурдно затоа што во времето за кое станува збор должностите на господинот Керим во ’Медија принт Македонија‘ се ставени во мирување, бидејќи извршуваше важна меѓународна функција.

Независно од тоа што објавеното во јавноста го сметаме за апсолутно нерелевантно, групацијата ВАЦ ќе постапи согласно со своите правила и кодекси, што значи дека ќе спроведе внатрешна контрола врзана за шпекулациите во кои се спомнува името на оваа компанија.

На крајот, уште еднаш нагласуваме дека остануваме доследни на ставот оти нашата компанија, како и досега, е подготвена да соработува со надлежните државни органи при спроведување на нивните активности, во согласност со законите и прописите на земјава, без притоа да ги користи редакциите и новинарите како барикади“, се вели во реакцијата на „Медија принт Македонија“.