Рединг (15) најмлад Гран-при победник
Скот Рединг триумфира во класата до 125 кубни сантиметри во Донингтон Парк
Британецот Скот Рединг од Априлија стана најмладиот гран-при победник, триумфирајќи во класата до 125 ксм на возраст од 15 години. Згора на тоа, дебитантот во својата само осма трка го прекина и британскиот пост од дури 451 гран-при без победа во оваа класа по Чес Мортимер во Шпанија во 1973 година.
Рединг беше пет секунди побрз од лидерот во вкупниот поредок Мајк ди Мелјо од Франција, кој стартуваше од 20. позиција, а третото место го освои Шпанецот Марк Маркез. Ди Мелјо има 132 поена, втор е Италијанецот Симоне Корзи со 109, а трет Германецот Штефан Брадл со 77.
Финецот Мика Калио од КТМ беше најбрз во класата до 250 ксм, во која веднаш зад себе ги остави Италијанецот Марко Симончели од Џилера и Шпанецот Алваро Баутиста од Априлија. Калио води севкупно со 131 поен, втор е Симончели со 123, а трет Шпанецот Алекс Дебон со 101. |
