Потешко не можеше за ракометарите
Македонија на СП во група со Германија, со Полска, со Русија, со Тунис и со Алжир
Роберт Димитриевски
Господ не ја слушна молбата на капитенот на ракометната репрезентација на Македонија, Кирил Лазаров, кој ни на сон не ја посакуваше Русија во нашата група на 21. Светско првенство во Хрватска. Покрај Русија, Севишниот се погрижи во групата Ц избраниците на селекторот Иле Темелковски да ги добијат и бранителот на титулата Германија, вицешампионот Полска, четвртопласираниот од СП 2005, Тунис, како и Алжир! На стартот, на 17 јануари, црвено-жолтите ќе играат со Тунис, утредента со Алжир, а ден потоа со Полска. Дваесетти јануари е слободен ден, по кој следуваат дуелите со Германија и наредниот ден со Русија. Градот-домаќин на групата се' уште не е официјализиран, но со голема веројатност тоа ќе биде Вараждин, чијашто нова сала има капацитет од 4.000 места за седење.
„Најголемиот душман да ни ја избираше групата, немаше вака да ја состави!“, реагира Темелковски. „Да се помине ваква група е рамно на медал. Но, нема место за жалење. Коба би почнале со две победи, а потоа достојно да им се спротивставиме на фаворитите, па што биде“.
„Во прв момент бев шокиран кога ги слушнав противниците во групата, но потоа сфатив дека ова е голем предизвик за нас, за докажување на квалитетот што неспорно го имаме, дотолку повеќе што слушам дека сите во групата веќе ги впишале двата бода од мечевите со нас. Ако не красат борбениот дух, другарството и патриотизмот од квалификациите, можеме да бидеме и најпријатното изненадување на првенството“, оптимист е капитенот Кирил Лазаров. „Имаме добар распоред, треба да се фокусираме на првите две средби и да не се заморуваме однапред со некакви Германии, Полски и Русии. Уште денес треба да почнеме да се подготвуваме, бидејќи со импровизации и со кампања во минута до 12 ништо нема да направиме. Ако во квалификациите баравме поддршка од навивачите, сега таа ќе ни биде двојно попотребна. Хрватска не е далеку“.
„Најтешка можна група, но, за среќа, распоредот е поволен. Ако воопшто сакаме да направиме нешто во групата, мораме на стартот да го совладаме Тунис, а потоа и Алжир, против кого сме фаворити, по што ќе се обидеме да изненадиме еден од трите фаворита. Според мојата теорија, најмали ни се изгледите против Полска, зашто тоа ќе ни биде трет натпревар во три дена, па логично е да не стигне заморот. Со Германците, објективно, нема што да бараме и најверојатно ќе се штедиме, па, колку и да звучи чудно, нашата шанса е Русија во последното коло“, смета јунакот од баражот со Исланд, голманот Борко Ристовски.
Од ривалите во групата Македонија досега има играно против трикратниот светски првак Германија, од која загуби со 36:25 на СП 1999 во Египет, како и со двократниот светски шампион Русија, со која ремизира 26:26 на ЕП 1998 во Италија. На последното СП минатата година домаќинот Германија беше прв, Полјаците втори, Русите шести, Тунижаните 11., а Алжирците не учествуваа.
На својот единствен мундијал Македонија го освои 18 место. Покрај од Германија, генерацијата предводена од Пепи Манасков тогаш загуби и од Куба со 32:18, потоа од Бразил со 30:27 и од Египет со 30:24, а ја совлада Саудиска Арабија со 28:21.
Домаќинот со Шведска и со Шпанија
Во групата А ќе играат Франција, Унгарија, Словачка, Романија, второпласираниот во панамериканските квалификации што ќе се одржат од 24 до 28 јуни и Австралија. Групата Б ја сочинуваат домаќинот Хрватска, потоа Шведска, Шпанија, Јужна Кореја, Кувајт и третиот од Панамерика. Во групата Д ќе се натпреваруваат Данска, Норвешка, Египет, победникот од Панамерика, Србија и Саудиска Арабија.
Првите три селекции од групите А и Б ќе формираат нова група во која ќе ги пренесат бодовите од меѓусебните дуели од прелиминарната фаза, а така ќе се вкрстат и групите Ц и Д. Двете најдобри од двете групи од вториот круг ќе се судрат во полуфиналето. Тимовите од четвртото до шестото место во своите групи од првата фаза продолжуваат во т.н. Претседателски куп, во кој ќе разигруваат за пласман од 13 до 24 место.
Светското првенство ќе се одржи од 16 јануари до 1 февруари 2009 година во шест хрватски градови: Загреб, Сплит, Задар, Осиек, Пореч и Вараждин. Шампионатот ќе го отворат Хрватска и Кореја во Сплит. |
