Билиќ: Ниту судијата ниту лошата среќа, сами им дадовме шанса
По шокантниот пораз од Турција селекторот на Хрватска Славен Билиќ бил толку скршен што размислувал тотално да се откаже од фудбалот. „Многу болка ми нанесе овој натпревар и мислев не само да заминам од селекторското место туку воопшто од фудбалот. Но сега по неколку дена мислам дека овие момчиња има што да кажат и во иднина. Нашиот план пред ЕП беше да дојдеме до финале. Но тоа не се случи. Долго останавме во соблекувалната, сите беа тажни. Поголемиот дел плачеа...“, откри Билиќ, кој кажа дека е исклучително горд на своите фудбалери.
“Направивме голем успех со самиот влез во вториот круг и начинот на кој дојдовме до тоа со три победи. Бевме големи во однесувањето и во квалитетот на нашите игри. Се простуваме од ЕП без пораз. Но разочарани сме бидејќи сакавме финале“, додаде Билиќ, кој смета дека примениот гол не е несреќа, туку грешка.
„Пеналите се среќа, а голот што го примивме е наша грешка. Требаше подобро да реагираме кога дојдовме во посед на топката. Прерано почнавме да славиме. Ние им дадовме шанса. Ова ќе не следи цел живот, но моите играчи се херои“, потенцира Билиќ, кој не го смета за виновен ниту судијата Росети, кој остана „ладен“ на неговото барање за замена.
Фатих Терим: Турција е великан
По големата победа на Турција над Хрватска, селекторот Фатих Терим ја опиша својата земја како „голема фудбалска нација“.
„Она што се случи претставува нешто посебно за нашата фудбалска историја. Нема дилеми, станаваме една од водечките фудбалски сили. Нашиот народ може да ужива. Ако нашите сонародници се гордеат со нас, тогаш и ние се гордееме со нив“, изјави веројатно најдобриот тренер што Турција некогаш го имала.
Еден од стрелците во сега веќе историската пенал серија Хамит Алтинтоп вели дека Турција нема намера да се сопне во полуфиналето: „Ако продолжиме да веруваме во себе, се е можно. Добро е што останавме со ладни глави до самиот крај. Во минатото немавме таков пристап и разликата е очигледна“, вели играчот од средниот ред на Баерн. |
