Заем од 2,5 милиони евра од ЕБОР

Европската банка за обнова и развој, ЕБОР, одобри заем од 2,5 милиони евра за прилепска „Витаминка“. Заемот ќе се искористи за купување опрема за производство и пакување, како и за имплементација на најсовремени мерки за енергетска ефикасност во „Витаминка“, соопштија вчера од канцеларијата на ЕБОР во Скопје. „Ни претставува задоволство да ја продолжиме соработката со ’Витаминка’ и да ја поддржиме развојната стратегија и натамошниот раст на компанијата. Со новиот заем ќе се зголеми обемот на производство на напивките во прав и крцкавите производи, со цел да се задоволи растечката побарувачка за овие производи, како и да се подобри сопствената енергетска ефикасност“, оцени Елена Урумовска, претставник на ЕБОР. (МИА)