„Купи куќа, купи стан“ во пет до дванаесет

Како и за се' друго, граѓаните очигледно ќе го чекаат крајот на февруари за да поднесат апликации за евтините станбени кредити

Соња Маџовска


Како и за се' друго, македонските граѓани, очигледно, ќе го чекаат крајот на февруари за да поднесат апликации ��а евтините станбени кредити од проектот „Купи куќа, купи стан“. Рокот за поднесување барања до банките е до 1 март. Засега во банките само се прашува и се подигнуваат документи, но нема многу поднесени барања. Или, како што вели претседателот на Управниот одбор на Шпаркасе банка, Срѓан Крстиќ, „многу повеќе има подигнати апликации отколку реално поднесени“.

Сепак, тој очекува навалица да има кон крајот на месецов, со оглед на интересот. „Веројатно граѓаните како и во многу други случаи го испитуваат пулсот, проверуваат дали проектот навистина функционира на начин на кој е презентиран и очекувам искрено засилено аплицирање во втората половина на февруари. На 1 март се затвора можноста за аплицирање, а ние сме познати по тоа да чекаме до последна минута и верувам дека истото ќе биде и во овој случај“, вели Крстиќ.

Тој најави дека засега Шпаркасе банка не планира да ја менува каматната политика во делот на депозитите. Но, потенцираше дека постојано ги следат движењата на пазарот и сигналите од централата во Австрија, референтната каматна стапка на Народна банка на Македонија, па во согласност со тоа и ќе реагираат. Од Шпаркасе велат дека штедењето продолжува да расте, и на депозитите во евра и на денарските заштеди. Минатогодишниот тренд на претворање на штедните влогови од евра во денари е запрен, по смирувачките тонови кои стигнаа од Европа, дека еврото е стабилно.

Крстиќ смета дека се' уште е рано да се прогнозира какви ќе бидат трендовите во делот на кредитирањето за цела година. Но, признава дека ризици постојат и дека има намалување на економската активност во делот на нарачките на извозните компании кои имаат партнери од европските земји.