Дебитантот Хал ја слави својата најголема победа во историјата
Новиот премиерлигаш го шокира Арсенал на негов терен со 2:1
„Малиот Хал“ ја слави својата најголема победа во клупската историја. Тимот, кој прв пат настапува во англиското елитно друштво, крајно неочекувано го совлада Арсенал на неговиот „Емирати“, успех кој не им пошол од нога ниту на некои големи светски екипи. Хал одигра храбро, дрско и ги искористи шансите што му се укажаа, па заслужено сите светски медиуми му посветија најголем внимание, ставајќи го во сенка ливерпулското дерби меѓу Евертон и Ливерпул, кое го добија фудбалерите на Рафаел Бенитез со 2:0, со головите на Торес во вториот дел.
Далеку од тоа дека Арсенал не доминираше, ретко која екипа успева да ја задржи рамнотежата на поседот на топката, па така тоа не му успеа ниту на Хал (63 отсто за Арсенал). Меѓутоа, тимот на Венгер уште еднаш стана жртва на сопствената атрактивност и настојување со бескрајни додавања буквално да се влезе заедно со топката во гол. Нивната, навистина добра и комбинаторна игра, конечно, резултираше со водство во 51 минута, Тео Волкот, се проби по десната страна, нафрли, а Пол Мекшин несреќно блокираше и ја уфрли во сопствената мрежа. Но, потоа следуваше шокот. Во 62 минута еден од најубавите голови сезонава го постигна Џовани, со феноменален удар од над 20 метри од косо ја испрати топката во левиот горен агол на Алмунија. Но, тоа не му беше доволно на гостинот. Пет минути подоцна Даниел Кусин скокна ѓаволски високо по еден корнер и донесе сензационално водство. До крајот Арсенал направи се' да даде гол, но неколкуте шанси не ги искористи.
Сензационалниот пораз ги шокира сите навивачи на Арсенал, како и тренерот Арсен Венгер. Поразот од Хал е само втор за Арсенал откако се пресели од „Хајбери“ на „Емирати“ во 60 одиграни натпревари.
„Играчите на Хал имаа желба за победа. Кога пристапот на фудбалерите од самиот старт не е оној вистинскиот постои ризик од пораз. Дефанзивно тие одиграа одлично. Мислам дека создадовме веројатно 25 шанси за гол, што стоотстотни, што полушанси, но нивниот голман и одбраната беа фантастични. Имавме шанса да останеме на врвот, но не ја искористивме. Сега е најбитно добро да изреагираме во мечот од Лигата на шампионите против Порто“, изјави Венгер, кој ја објасни атмосферата и во соблекувалната: „Сите беа разочарани и со главите надолу, а сега треба да се најде психолошка сила за враќање во нормала. Уверен сум дека во утре против Порто ќе го покажат своето вистинско лице“, додаде Венгер.
Резулати: Арсенал - Хал 1:2, Астон Вила - Сандерленд 2:1, Фулам - Вест Хем 1:2, Манчестер Ј. - Болтон 2:0, Мидлсборо - ВБА 0:1, Њукасл - Блекбурн 1:2, Стоук - Челзи 0:2. Табела: Челзи 14, Ливерпул 14, Астон Вила 13, Арсенал 12, Вест Хем 12, Хал 11, Блекбурн 10, Манчестер С. 9 (-1), Манчестер Ј. 8 (-1)......
|
