Пораз на Баерн (М), голејада во Бремен
Баварците загубија од Хановер со 1:0, Вердер го победи новиот бундеслигаш Хофенхајм со 5:4
Јирген Клинсман дефинитивно нема мирен сон. По „петардата“ од Вердер во минатото коло, Баерн (М), викендот во Хановер, го запиша и вториот пораз во низа во бундеслигашката конкуренција. Истоимениот противник славеше со 1:0 со погодокот на Хушти во 23 минута од слободен удар иако Баварците беа доминентен тим во текот на целиот натпревар, но нивната иницијатива не вроди со плод.
Вистинска голеада и трилер проследија гледачите во Бремен каде Вердер со играч помалку го порази новиот бундеслигаш, Хофенхајм, со 5:4. Распродадениот „Везер“ стадион „експлодира“ уште во осмата минута кога Оцил им обезбеди предност на домашните. Осум минути по примениот гол Хофенхајм успеа да израмни преку Ибишевиќ, но Вердер ја врати позитивата по неполни 60 секунди, откако Пизаро со пета ја затресе противничката мрежа. Четири минути подоцна во листата на стрелци се запиша и Диего за водство на составот на Томас Шаф со 3:1, Хунт во 30 минута зголеми на 4:1, а точка на одлично прво полувреме стави Салиховиќ со голот од слободен удар во 36 минута за намалување на негативата на Хофенхајм.
И покрај двата гола минус Хофенхајм не се предаваше во продолжението и со вториот гол на Ибишевиќ во 62 минута од пенал гостинските фудбалери ја вратија неизвеноста во мечот. Но, работите дополнително се искомпликуваа за Вердер. На пеналот му претходеше старт на Мертезакер, кој го срушти екзекуторот на најстрогата каза, за што судијата му покажа црвен картон на дефанзивецот на домашните. Предноста од фудбалер повеќе на теренот Хофехнајм ја искористи во 71 минута. Ибишевиќ, овојпат во улога на асистент, го проигра Компер, кој погодува за 4:4. Но, и тука не беше крајот на резултатската нишалка во Бремен. Вердер на девет минути пред крајот по петти пат ја начна противничката мрежа, стрелец на погодок беше младиот Оцил, за конечни 5:4.
Киксовите на Баерн (М) во саботата и на Шалке 04 во петокот (поразен од Келн со 1:0), го искористи Хамбургер кој со победата над Борусија Менхенгладбах со 1:0 го презеде врвот на табелата во германското првенство. Стрелец на единствениот гол на „АОЛ арена“ беше хрватскиот интернационалец Младен Петриќ во 11 минута. Скок на второто место направи Баер (Л) по триумфот кај Бохум со 3:2, Борусија во Дортмунд го совлада Штутгарт со убедливи 3:0, а изненадувањето на колото го приреди Ене��џи Котбус на нашиот Игор Митрески со победата во Берлин над Херта со 1:0.
Резултати: Вердер - Хофенхајм 5:4, Хановер - Баерн Минхен 1:0, Херта - Енерџи Котбус 0:1, Хамбургер - Борусија Менхенгладбах 1:0, Бохум - Баер Леверкузен 2:3, Борусија Дортмунд - Штутгарт 3:0, Келн - Шалке 04 1:0. Вчера играа: Карлсруе - Волфсбург, Ајнтрахт - Арминија.
Табела: Хамбургер 13, Баер Леверкузен 12, Вердер 11, Шалке 04 11, Борусија Дортмунд 11, Хофенхајм 10, Штутгарт 10, Волфсбург 9 (-1), Баерн Минхен 8, Херта 8, Келн 7, Хановер 7, Бохум 5, Арминија 5 (-1), Енерџи Котбус 5, Карлсруе 3 (-2), Борусија Менхенгладбах 3, Ајнтрахт 2 (-1). |
