Претходен број

Солени влезници за ЕП за ракометарки во Македонија

Љубителите на ракометот ќе треба длабоко да брцнат во џеповите ако сакаат да ги следат од трибините натпреварите на претстојното 8. Европско првенство за сениорки што ќе се одржи во Македонија од 2 до 14 декември. Билетот за целиот шампионат, односно за сите 47 мечеви во Скопје и во Охрид, чини 500 евра, а во претпродажба преку интернет, која почна пред неколку дена, е сто евра помалку! Сите 26 средби во скопската сала „Борис Трајковски“, која ќе биде домаќин на две групи од прелиминарната фаза, на една од групите од втората фаза и на завршницата на ЕП, ќе може да се гледаат за 400 евра, односно за 350 за билет купен во претпродажба. За 21 меч во „Билјанини извори“ во Охрид, плус пет од завршницата во Скопје, треба да се платат 350 (290) евра.

Влезницата за петте меча од двата последни дена во Скопје, односно двете полуфинални средби и мечевите за петтото, за третото и за првото место, чини 250 (170) евра. Само за малото и за големото финале треба да се платат 150 (100) евра, колку и само за двата полуфинални дуела и за тој за петтото место ден претходно. Деветте меча од втората фаза во Скопје „вредат“ 200 (120) евра, во Охрид 200 (80), а дневната карта за три средби е 60 (45) евра.

Блок-билетот за 12. меча во групите Б и Ц од првата фаза во Охрид се продава за 150 (80) евра, а истата понуда за групите А и Д во Скопје е 150 (100). Две кола од групите во Скопје чинат 90 (65) евра, а во Охрид 90 (50) евра. Конечно, најевтин е дневниот тикет за две средби од една од групите во почетната фаза, чија цена е 30 евра, односно 25 во претпродажба. (Р.Д.)