Јавна вечера по повод „Тајната вечера“ на Станковски
„Јавна вечера по повод „Тајната вечера“ во Галерија 7 (1990-2009)“ гласеше насловот на перформансот со ликовниот уметник Александар Станковски, кој беше одржан во присуство на голем број луѓе во Галеријата, во организација на Фестивалот за современа уметност АКТО од Битола. Станковски е автор на познатата слика „Тајната вечера“ на која се насликани дел од членовите на некогашната уметничка група „Зеро“ од осумдесеттите години на минатиот век. Во средата ноќе дел од тогашните членови заедно со млади уметници актуелни денешни автори во истиот простор каде е насликано делото разменуваа позитивни енергии.
Запрашан зошто токму сега чаршијата повторно заживува и полека станува центар на уметнички случувања, Станковски рече: „Таа го има магнетизмот и магијата сеуште. Отуѓувањето од неа се случи поради политиката, поради сите конфесионални анимозитети кои се појавија. Но, мислам дека е време да отидат во историјата, а ние да ја ползуваме убавината на овој простор.“
Со перформансот АКТО го најави своето четврто издание што ќе се одржи на тема „Поколенија“ од 12 до 16 август во Битола. (К.Б.) |
