Концерт на гудачкиот квартет „Марија“ на „Скопско лето“
Во рамките на „Скопско лето“, вечерва во 21 часот, на улицата „Македонија“ пред книжарницата на „Култура“, концерт ќе одржи гудачкиот квартет „Марија“. Концертот е насловен „Вирус“, а квартетот ќе изведува дела од Тартини, Бизе, Брамс, Пјацола, Хачатуријан, Бетовен, Офенбах...
Во гудачкиот квартет „Марија“ членуваат: Пламенка Трајковска, Лада Петровска и Дубравка Зајкова, виолини и Дејан Теодосиевски, виолончело. Квартетот е основан во 1997 година, со цел да ја приближи класичната музика до македонската јавност во, но и надвор од концертните подиуми. Членовите на „Марија“ имаат богата професионална биографија, тие се членови на Македонската филхармонија.
Вечерашниот концерт претставува нов исчекор во креативноста на гудачкиот квартет. Тие прават сосема нов пристап кон класичната музичка материја. Ќе изведат единаесет композиции од класичната музичка литература, но аранжирани во поп, рок, техно и други современи изрази. (К.Р.) |
