Ќе се расветли ли мистеријата за убиството во „Биг фиш“

Истрагата заврши, а адвокатите најавуваат дека судскиот процес ќе фрли новa светлина врз мотивите за трикратното убиство

Љубиша Станковиќ


Истрагата, која изминатите два месеца се водеше за трикратното убиство што беше извршено во ресторанот „Биг фиш“ во скопскат�� населба Аеродром, е комплетирана и сега предметот е повторно во рацете на Обвинителството. Наскоро се очекува да биде подготвен обвинителен акт за осомничениот Тони Денковски, кој се товари за убиство на три лица во Скопје.

Во списите од предметот, како што се дознава, се наоѓа и вештиот наод и мислењето за психичката состојба на Денковски. Според наши сознанија, тројца психијатри го посетиле осомничениот во затворот „Скопје“ и неофицијално, конечното мислење е дека Денковски бил пресметлив во моментот кога пукал. Осомничениот за убиствата во меѓувреме се откажал од услугите на бранителот што му беше одреден по службена должност и ангажирал свој адвокат.

„Пред извесно време семејството на Денковски ме ангажира за негов бранител. Од разговорот што го имав со мојот штитеник, можам да потврдам дека тој во текот на истрагата го користел правото да се брани со молчење и дека врз него било извршено вештачење. Нема дилема дека на главен претрес тој ќе го искористи правото да даде своја одбрана што ќе фрли ново светло на настанот“, вели за „Утрински весник“ скопскиот адвокат Звонко Давидовиќ.

За случајот, кој се одигра во ресторанот „Биг фиш“, се вртат неколку шпекулации околу мотивот за трикратното убиство. Според една од верзиите, Денковски со години се познавал со една од жртвите. Тој, наводно, имал контакти со велешанецот Јордан Јорданов (36) викан ’Ркулот, но кога тој почнал да му се заканува, се случи крвавата пресметка на 2 септември во ресторанот „Биг фиш“ што се наоѓа во Трговиот центар „13 Ноември“.

Според друга верзија за настаните, на Денковски му биле упатувани закани по телефон, но тој не можел да открие кој стои зад нив. Според трета верзија, пак, тој сосема случајно се нашол во друштво на припадниците на „франкфуртската мафија“. Дали на Денковски навистина му биле упатувани закани за неговиот живот и за животот на неговите деца, ќе се дознае на скорешното судење.

Трикратното убиство се случи на 2 септември годинава, околу 20 часот. Осомничениот Денковски влегол во рибниот ресторан „Биг фиш“, а потоа рафално пукал во тројцата што седеле во угостителскиот објект. Од истрелите на самото место бил убиен Владо Милошев, вработен во МВР, додека со тешки повреди во Ургентен центар беа пренесени велешанецот Јордан Јорданов-Ркулот и 26-годишниот Влатко Андревски, кои подоцна им подлегнаа на повредите.

Според една верзија, Денковски сам влегол во ресторанот, но според други сознанија, се појавил во придружба на негов пријател, по што накратко заминал од ресторанот. Потоа се вратил со автоматско оружје в раце и рафално пукал во тројцата. Нападот го преживеала само една девојка што седела со нив на масата. Откако ги застрелал, Денковски го фрлил автоматот пред влезот на ресторанот и заминал. Утредента доброволно и' се предал на полицијата.