Тито направи влада, Бранко чека во сенка

НСДП промовираше влада во сенка, СДСМ не сака потенцијалните министри предвреме „да ги лаат кучиња“

 Александра М. Митевска

Пратеничката Соња Мираковска ќе биде прва полицајка, а нејзиниот колега, Горан Мисовски, ќе ја води одбраната. Поранешниот заменик-министер Предраг Трпевски сега ќе биде главен во ресорот за финансии, амбасадорот Благоја Зашов ќе шефува со дипломатијата, докторот Милчо Пановски ќе застане на чело на здравството... Не е во прашање реконструкција на актуелната влада, туку ова се некои од членовите во владата во сенка, што вчера ја промовираше опозициската НСДП.

Лидерот на новите социјалдемократи, Тито Петковски, го претрка својот партнер во опозицискиот фронт - лидерот на СДСМ, Бранко Црвенковски, кој од поодамна најави „паралелна влада“. Но, тој проект се' уште не е реализиран, зашто социјалдемократите во меѓувреме проценија дека е подобро да почекаат изборите да станат извесни, пред да ги извадат од сенка своите кадровски адути. Црвенковски пред извесно време посочи дека во партијата веќе се знае кој кое министерство во сенка ќе го води и дека само се чека и официјално да почне предизборието.

Меѓутоа, тоа што не се знае со сигурност е дали Црвенковски ќе биде премиер во сенка, ако се имаат предвид шпекулациите дека тој размислувал дали повторно да се натпреварува и за „вистинската“ премиерска функција. Секретарот на СДСМ, Андреј Петров, за „владата на НСДП“ вели дека е легитимно право на секоја партија да понуди свои визии и свој начин на дејствување. „НСДП е со нас во опозицискиот фронт и заедно сме во битката против власта. Но, ние се' уште не сме формирале предизборна коалиција. Да ја прифатеше ВМРО-ДПМНЕ иницијативата за распуштање на парламентот, веднаш ќе ја промовиравме нашата влада во сенка“, објаснува Петров.

Тој додава дека СДСМ ќе го направи тоа кога изборите ќе бидат извесни, бидејќи на граѓаните треба да им бидат презентирани луѓето што во иднина би ја воделе државата. „Во период кога не се знае кога ќе има избори, нема потреба тие луѓе да им се пуштат на уличните кучиња да ги лаат. А, за жал, таков е стилот на актуелната власт“, нагласува секретарот на СДСМ.

И од НСДП велат дека со формирањето на владата во сенка воопшто не го доведуваат во прашање своето учество во опозицискиот фронт. Според Петковски, мотивот за формирање „опозициска влада“ произлегол од тоа што државата се соочува со големи проблеми, поголеми и од тие во првите години од осамостојувањето. Владата во сенка за НСДП претставува можност за промоција на политики и на компетентни личности. Веќе е изготвена и „владината“ програма „Иднината има предност“.

Претседател на владата засега не е избран, но затоа, пак, се замислени неколку нови ресори, како за енергетика и за млади и спорт, додека ресорот култура се спојува со образование и наука.

Формирање влада во сенка досега не беше карактеристика за македонските партии, со исклучок на неколку не толку успешни обиди во таа насока. Причината за ова аналитичарите ја гледаат во тоа што сите наши влади се коалициски, бидејќи домашната политичка реалност го наметнува како непишано правило коалицирањето на победничката партија од македонскиот камп со партнер од албанскиот блок.

Затоа, пак, владите во сенка, на пример, се препознатлив знак за британскиот парламентаризам, кој е многу поразличен од македонскиот. Таму две големи партии се менуваат на власт и најчесто обезбедуваат мнозинство во Претставничкиот дом, така што коалициски влади се многу ретки. Секој министер во британската влада добива свој „двојник“ во сенка од опозицискиот табор, кој има обврска поуверливо да ги критикува потезите на владејачкиот министер и да понуди алтернативни мерки за одредени прашања, со цел да ја натера извршната власт на поквалитетно функционирање. Владата во сенка има задача да ја убеди јавноста дека е поквалитетна од „вистинската“ и оти заслужува доверба на следните избори. (A.M.M.)