На Фуере никој не му се извинил

На евроамбасадорот Ерван Фуере се' уште никој од ВМРО-ДПМНЕ не му се извинил за обвинувањата од пратеникот Влатко Ѓорчев, кажани во Брисел, дека тој е партиски мегафон на СДСМ и бирократ што му здодеал на македонскиот народ.

„Немаше директно извинување. Тоа зависи од самите личности дали ќе го направат тоа, но се надевам дека ја сфаќаат штетата што и' е направена на земјата со изјавата“, рече Фуере. Според него, поприоритетно е Владата да се фокусира на предизвиците со кои се соочува земјата, а не да го троши времето на вакви обвинувања и акции што го уриваат имиџот на Македонија. „Важно е оваа Влада да демонстрира, не само декларативно, туку и со постапки дека е целосно посветена на евроинтегрирањето, бидејќи изјавите од Ѓорчев не ја рефлектираат таа заложба“, изјави Фуере.

За евроамбасадорот е потребно и политичките партии да демонстрираат поголем дијалог и нивно фокусирање на вистинските предизвици со кои се соочува Македонија, како што се многу сериозните економски проблеми и прашањето со името. „Не постои доволно дијалог меѓу сите политички лидери и, бидејќи тие не разговараат меѓу себе, тоа има негативен инпакт врз дијалогот и работата на Собранието“, смета Фуере, кој повтори дека особено Владата треба да го преземе водството во создавањето поотворена клима за дијалог што ќе ја редуцира атмосферата на конфронтација и поделбата што постои во општеството. (Т.Г.)