Маршал Тито ќе замине од Широк сокак

Најпознатата улица во Битола и официјално ќе се вика „Широк сокак“

Битола - „Маршал Тито“ да се преименува во „Широк сокак“, „Иво Лола Рибар“ во „Македонска фаланга“, „Иван Милутиновиќ“ да биде „Македонски гемиџии“, а „Едвард Кардељ“ - „Баталјон Стив Наумов“. Бомбашот „Бошко Буха“ може да стане „Круме Кепески“, додека булеварот „Социјалистичка револуција“ - „Методија Андонов-Ченто“.

Ова е дел од листата за промена на имињата на улиците предложена од Комисијата за комунални дејности во Советот на Општина Битола. Меѓу 60-те предлози за преименување на улиците се наоѓа и ЈНА, која по ново би го носела името „Рокдајл“, по збратимената општина во Сиднеј. Според предлогот, „Борис Кидрич“ би се преименувала во „Димитар Илиевски- Мурато“, улицата „Босна“ во „Мустафа Кемал Ататурк“, „Железничка“ во „Филип Втори Македонски“, а населбата Кланица би се преименувала во Ајредин Демировски.

Претседателот на Комисијата за комунални дејности, советникот Сашо Илијовски, кој е од редовите на ВМРО-ДПМНЕ, вели дека станува збор за иницијатива која трае подолго, а сега само ќе финишира.

Опозицијата во Советот на Битола обвинува дека зад преименувањето на дел од улиците во градот се крие обид за бришење на еден период од историјата на Македонија. Советниците од СДСМ и ЛДП се сомневаат дека зад деноминацијата се кријат исклучиво идеолошки причини.

„Оваа власт сака да ја избрише историјата и тоа оној дел поврзан со социјализмот. Причината за новите имања е исклучиво на идеолошка основа“, вели Томе Наумов, советник од СДСМ.

Опозицијата смета дека за промена на имињата на улиците мора да бидат консултирани граѓаните, бидејќи тоа ќе значи и промена на нивните лични документи за што ќе бидат изложени на дополнителен трошок. (А.Б.)