Ајде славејчиња, пријавувајте се!



Советот за грижи и воспитување на децата на Град Скопје и Советот на Фестивалот на детска песна „Златно славејче“ распишаа конкурс за избор на детски песни за предучилишна и училишна возраст, што ќе бидат изведени на фестивалот „Златно славејче 2012“

Композициите што ќе бидат испратени на конкурсот треба да бидат лесно прифатливи, допадливи, современи детски песни и да не биле претходно јавно објавувани и изведувани. Еден автор може да биде застапен најмногу со две композиции, а на учесниците на конкурсот им се препорачува да обрнат посебно внимание на детски песни за предучилишна возраст. Конкурсната пратка треба да содржи: два примерока на нотниот текст со впишан текст и хармонски симболи, како и текст во два примерока. Пожелно е авторите да испратат и демо-снимка.

Авторите на текстот и музиката што ќе бидат избрани за изведба на фестивалот ,,Златно славејче 2012" ќе бидат хонорирани. Организаторот го задржува правото на евентуални корекции на избраните творби. Творбите треба да се испраќаат на адреса: Здружение Совет за грижи и воспитување на децата на град Скопје, улица „Илинденска“ 55, со назнака за ,,Златно славејче 2012“, најдоцна до 15 март. Сите дополнителни информации може да се добијат на телефонскиот број 02/3221-745.