Тутунски од Прилеп тоне во загуби

Тутунски комбинат - Прилеп за 2011 прикажа загуба од 1,26 милијарди денари, или 20 милиони евра, која е речиси четири пати повисока во однос на онаа од 2010 година, кога загубата била 343,7 милиони денари.

Компанијата бележи раст на приходите од 1,307 милијарди денари, но расходите се далеку поголеми и изнесувале 2,51 милијарди евра.

За загубите во кои се' повеќе тоне комбинатот нема официјални информации од Тутунски - Прилеп. Директорот Алекандар Дерменџиев не одговара на телефонските повици, а во фирмата никој не сака јавно да говори. Вработените кои инсистираат на анонимност велат дека редовно им се исплаќаат плати и придонеси, но капацитетите на фабриката се речиси празни. „Извоз речиси нема. Месечниот пласман на цигари на домашниот пазар изнесува околу 60 тони. Тоа се екстремно мали количества ако се прави споредба со добрите времиња пред 15-ина години. Но, најлошо е што не знаеме што не' чека“, коментираат тајно вработените.

Акционерско Собрание е закажано за 12 овој месец. Се очекува дека тогаш конечно ќе бидат усвоени мерки за спас на фирмата од финансискиот колапс, кој трае со години и е резултат од недомаќинското работење, на секоја раководна гарнитура без исклучок, до доаѓањето на новата.

Акционерите и вработените очекуваат и се надеваат дека овој менаџерски тим на чело со Дерменџиев и со поддршка на Владата ќе најдат излезни решенија за комбинатат да опстане. Тие се заинтересирани за продажба на стратегиски инвеститор. Но, велат дека воопшто нема најави дека некоја странска компанија од овој бизнис покажала сериозен интерес за влез во Комбинатот, на чие салдо се евидентирани огромни загуби и околу 1.100 вработени. (Мн.Т.)