По 20 години, пицеријата „Мечос“ става клуч на врата

В четврток ресторанот ја организира последната забава со која овој бренд ќе замине во историјата

Сања Наумовска



Една од најстарите пицерии во Скопје, „Мечос“ в четврток престанува со работа. Симболично, со осмомартовска забава ресторанот ќе замине во историјата. Кризата, која изминатите месеци затвори голем број трговски објекти, затропа и на вратата на култната кафеана, која повеќе нема да ги храни многубројните љубители на добрата италијанска кујна. Амбасадори, политичари, уметници, туристи, а најмногу скопјани, нема кој не пробал дел од менито на познатиот скопски ресторан. Само неколку дена постара од македонската држава, пицеријата повеќе од две децении се наоѓаше на истото место во центарот на градот. Вратата на „Мечос“, првпат по отворањето во септември 1991 година, беше затворена непосредно пред Нова година од Управата за јавни приходи. Сопственикот Богољуб Јанчевски вели дека и покрај упорното пркосење на кризата неколку години по ред, решението на даночниците ја прелеа чашата, со што става крај на приказната за „Мечос“. Од угостителски објект кој некогаш вработувал над 20 работници, деновиве „Мечос“ преживува само со седуммина вработени, но и тие за некој ден ќе си заминат дома.

„За неколку дена згаснува еден бренд со голема традиција градена повеќе децении. Некои од постојаните гости, кои низ годините ми станаа и пријатели, велат дека немам морално право да затворам едно вакво култно место како ’Мечос’. Јас, пак, се прашувам, како би постапиле тие да се во моја кожа“, вели Јанчевски. Тој раскажува дека низ годините во „Мечос“ јаделе сите македонски премиери, поранешни и актуелни политичари, амбасадори и дипломати. Седум години по ред, вели Јанчевски, пиците и пастата на „Мечос“ беа број еден на листата на американските дипломати.

Ресторанот, по едномесечната пломба од УЈП, деновиве повторно работи, но за кратко. В четврток се организира последната забава со која овој бренд ќе замине во историјата. Ќе останат две тужби на сопственикот Јанчевски кон УЈП, поради, како што вели, бесправното пломбирање на дуќанот.

„Даночните инспектори го затворија ресторанот бидејќи еден вработен носеше свои лични пари в џеб. Немаше никаков проблем со фискалните сметки, тоа беше утврдено на лице место. Веднаш поднесовме жалба против решението на инспекторите и Управниот суд донесе решение со кое го поништи, поради непостоење опасност од повторување на прекршокот“, објаснува Јанчевски. И покрај тоа, вели тој, пицеријата беше затворена, првпат во својата историја, и тоа во периодот кога требаше да биде најпродуктивна, новогодишните и божикните празници.

„Државата треба да биде заштитник на угостителските објекти, особено оние кои изградиле бренд и кои опстојуваат долго време и покрај економската криза“, смета сопственикот на „Мечос“. „Казната за каков било прекршок во работата“, вели Јанчевски, „треба да биде последната мерка која ќе ја изрекуваат инспекторите. Постојат средства како опомени или обуки со кои ќе се избегнат вакви завршници, како што е со брендот ’Мечос’“, заклучува сопственикот.