Бомба пред училиште во Авганистан уби 15-мина
ПУЛ-И-АЛАМ - Во експлозија пред училиште, што се случи вчера јужно од главниот град на Авганистан, загинаа најмалку 15 лица, вклучувајќи и 12 ученици, изјави официјален претставник. Експлозијата се случи додека полициски конвој патролираше во областа Мохамад Агха во провинцијата Логар и беше предизвикана од експлозивни материјали во камион, изјави командантот на областа. „Засега можам да ви кажам дека загинаа 12 ученици, тројца полицајци и неколку цивили“, изјави Абдул Хамид во телефонскиот разговор за Ројтерс. Веднаш не беше откриена возраста на учениците. Камионот, кој превезувал експлозивни материјали, се превртел во реката во текот на ноќта, посочи Хамид.
Не е јасно дали експлозијата е саботажа во услови на зголемено насилство во Авганистан, или, пак, станува збор за несреќа. Авганистанците користат експлозивни материјали за градежни и рударски работи, дури и за лов. (Ројтерс)
|
