Сто илјади невработени чекаат на работа над осум години
Околу 40 проценти oд регистрираните 350.000 невработени, чекаат вработување подолго од 5 години
Маја Томиќ
Во земјава, каде што 349.063 лица се регистрирани како невработени, над 30 отсто од нив чекаат на работа повеќе од осум години. Поточно, според последните податоци од Агенцијата за вработување од крајот на мај, од вкупно невработените, дури 104.132 лица чекаат работа осум години, дури и повеќе. Околу 50.000 невработени, пак, на вработување чекаат меѓу пет и седум години, што значи дека приближно половина од вкупно невработените во државава најмалку пет години се надеваат дека ќе најдат работа. Покрај високата стапка на невработеност, која официјално изнесува 33 отсто и по која сме на врвот на невработеноста во Европа, загрижувачки се и податоците дека над 50 проценти од невработените се млади лица на возраст до 24 години, а дури 65 отсто се со основно или со никакво образование.
Невработеноста со години наназад беше, и останува, првостепен проблем во државава, со кој ниту една влада досега не успеа да се справи, пред се', да донесе странски инвестиции или да ги подобри условите за работа на домашните компании, со што ќе се зголеми вработеноста, односно ќе се ублажи стапката на невработеност.
Изминативе години, а и сега, како најсуштински мерки преземени од државата за ублажување на проблемот со невработеноста, е донесената Национална стратегија за вработување, и во нејзини рамки, Националниот акционен план за вработување. Но, она што е ставено на хартија засега малку се реализира во практика. Тоа го покажуваат официјалните бројки.
Од почетокот на годинава до крајот на мај бројот на лицата кои немаат работа постојано се движи околу нивото од 350.000. Или, на крајот на јануари, според АВРМ, имало 348.369 невработени, додека во мај немале работа 349.063 лица. Сразмерно на лошата состојба во сферата на невработеноста, слична е состојбата и со вработеноста. Односно, стапката на вработеност, иако има тенденција на пораст, изнесува околу 38 проценти, што е далеку под просекот во земјите на ЕУ, кој е позициониран на околу 70 отсто. Поточно, според Државниот завод за статистика, на крајот на мај стапката на невработени изнесувала 32,7 отсто и таа е за 6 отсто пониска од истиот период лани, додека вработеноста зафаќала 37,8 отсто и таа е за 2,9 проценти поголема од шесте месеци лани. Иако официјалните податоци покажуваат дека невработеноста се намалува, сепак, практично ситуацијата е поинаква. Како што е познато, годинава кризата остави без работа околу 20.000 лица, најмногу во металскиот и во текстилниот сектор. Од текстилните компании најавуваат дека наесен ќе има нов бран отпуштања, односно затворање на уште фирми, поради драстичното намалување на нарачките од партнерите од странство.
Експертите подолго време укажуваат дека невработеноста е покомплексен проблем, бидејќи лицата кои немаат работа во најчест случај се и сиромашни. Поради тоа што не учествуваат на пазарот на трудот тие и не можат да ги подобрат своите услови за живот, како и да придонесат за економскиот развој.
|
