ХАЈДИ КЛУМ

Се соблекува без проблем

Познатата германска супермоделка Хајди Клум изјави дека никогаш не и' претставувало проблем да позира гола, а како една од причините ја наведува и онаа дека израснала во семејството во кое разголеноста е сосема нормална работа.

„Израснав во семејство во кое моите родители честопати се шетаа низ домот без облека на себе. Моите родители и понатаму не се срамат да се соблечат. Секако, тоа не значи дека тие се стари хипици и дека се растрчуваат голи низ домот, но ако се пресоблекуваат во соба или ако некој влезе во бања додека се тушираат, никогаш нема да речат: ’О, боже, затвори ја вратата веднаш‘“, изјави триесет и шестгодишната манекенка Хајди Клум за магазинот „Татлер“.

Клум, која има четири деца - ќерката Лени од бракот со Флавио Бријаторе и два сина и ќерка од бракот со пејачот Сил, вели дека редовно со сопругот ги обновува брачните завети.

„Сил е голем традиционалист, вистински џентлмен. Толку ни се допадна нашата венчавка што решивме да ја повторуваме секоја година“, додаде Хајди, која признава дека многу се променила откако станала мајка. „И понатаму имам исти животни ставови, но, дефинитивно, не сум луда и импулсивна како што бев порано“, вели една од десетте најплатени моделки во светот во последните години.