ВАШИНГТОН - Американскиот претседател Барак Обама следната седмица ќе се обиде да ја зголеми намалената поддршка за реформите во здравствениот систем, со обраќање пред Конгресот, откако ова лето се наметнаа прашања и за неговото раководење и за законодавната програма. Обама, кој вложи значаен политички капитал од 2,5 илјади милијарди долари на поширок план за реорганизација на системот за здравствена заштита, ќе одржи говор на заедничката сесија на американскиот Сенат и Претставничкиот дом на 9 септември, јави претставник на администрацијата. Обраќањето следува поради опаднатите податоци во анкетите и се' поголемото спротивставување за плановите за реформи што, всушност, го поттикнаа претседателот да развие нова стратегија за постигнување договор.

Високиот советник на Белата куќа, Дејвид Акселрод, изјави дека Обама ќе говори пред Конгресот, бидејќи дебатата за здравствена заштита влезе во нова фаза. „Сега треба да ги повлечеме последните нишки заедно и да завршиме со тоа. Во различна фаза од оваа дебата ќе дискутираме каде се наоѓаме и што треба да направиме за да ги поминеме тие последни десет метри и да завршиме“.

Демократските и републиканските законодавци следната седмица ќе се вратат од едномесечна пауза, обележана со јавни состаноци во градското собрание на кои имаше огорчени расправии за здравствениот систем.

Обама има јасни цели за намалување на трошоците за здравствена заштита и обезбедување медицинско осигурување на околу 46 милиони Американци, кои сега немаат осигурување. Меѓутоа, опозицијата се фокусираше на „јавната опција“ - предложениот план од владата за здравствено осигурување, што Обама го поддржува како алтернативна опција на приватното осигурување. (Ројтерс)