Мета нов шеф на албанската дипломатија

Тирана – „Шеф на дипломатијата и вицепремиер во новата албанска влада ќе биде Илир Мета, лидер на Социјалистичкото движење за интеграција“. Ова го соопшти премиерот Сали Бериша по потпишувањето на договорот за коалициона влада со партијата на поранешниот премиер Илир Мета.

Бериша рече дека Социјалистичкото движење за интеграција ќе добие 20 отсто од поважните места во коалиционата влада, која ќе ја предводи неговата Демократска партија.

Мета со години беше еден од најжестоките критичари на Бериша, но по изборите, сепак, одлучи да состави заедничка влада, која би требало да биде промовирана до крајот на оваа или почетокот на идната недела.

Главната опозициона Социјалистичка партија објави дека не ги признава резултатите од јунските парламентарни избори и најави дека нема да учествува во работата на новиот албански парламент. (Макфакс)