Насловна

Легенда

Кокер си е Кокер

Легендарниот Џо Кокер го виде Скопје! Или обратно - скопјани го видоа и го слушнаа легендарниот пејач. Можеби не го дочекавме со исполнети места до крај, како што, на пример, ја дочекавме турбофолк-ѕвездата Цеца, но оние што присуствуваа завчеравечер во арената „Борис Трајковски“ во Скопје уживаа во звуците на мајсторот, кој во стил на вистински професионалец, прецизно и коректно си ја заврши работата за која беше дојден дури во Македонија.

Џо Кокер настапи во Скопје во рамките на својата промотивна турнеја на последниот албум „Hard Knocks“. Скромно облечен, во сако и црна кошула и панталони, Кокер уште еднаш покажа дека им пркоси на годините - настапот го започна со „Hitchcock Railways“, а атмосферата кулминираше со добро познатите хитови како „You Can Leave Your Hat On“, „Unchain Мy Heart“, „With a Little Help From My Friends“...

Во неговата музика и карактеристичен глас уживаа и министерката за внатрешни работи, Гордана Јанкулоска, со сопругот, министерот за надворешни работи, Антонио Милошоски, со поубавата половина, поп-пејачката Каролина со момчето... Концертот беше во организација на „Авалон продукција“.