Вардар заврши кај градските власти
За нов претседател на клубот е избран Зоран Шишковски, раководител на Секторот за спорт при Град Скопје
Сашко Ѓ. Димовски
Зоран Шишковски, раководител на секторот за спорт при Град Скопје, е избран за нов претседател на фудбалскиот клуб Вардар на најновото Собрание што во средата вечер се одржа во хотелот „Стоун Бриџ“. Притоа беа промовирани и новите колективни членови во највисокото тело на клубот кое во иднина ќе брои 10 делегати. Шест ќе има Град Скопје, а четири Јавното претпријатие за стопанисување со станбен и деловен простор (ЈПССДП). И тоа е се што е официјално засега. Останатото останува во доменот на шпекулации до најавеното ново Собрание што треба да се одржи наскоро. Тогаш треба да се откријат сите имиња или барем дел од нив кои ќе фигурираат како помагатели, спонзори, поддржувачи, кој ќе биде тренер на екипата, составување на играчкиот кадар, рангот во кој ќе се натпреваруваат црвено-црните во наредната сезона, итн...
„Благодарност за довербата што ја добив да бидам претседател на Вардар, наш најреномиран спортски колектив. Верувам дека со заеднички сили со Град Скопје и со другите домашни институции што ќе изразат интерес за помош ќе го вратиме стариот сјај на клубот и негово повторно движење по шампионски патеки“, изјави Шишковски, поранешен кошаркар, сега градски службеник и прв човек на црвено-црните, непосредно по неговото назначување.
„Можам да ветам дека ќе се обидам што е можно поуспешно да раководам со Вардар во желбите и амбициите за остварување на зацртаната цел, а таа е создавање на силен колектив во организациска смисла и силен играчки состав преку користење на одредени субвенции од Град Скопје меѓутоа и од акционерите и некои финансиери. Се надевам дека во скоро време клубот ќе добие квалитетни екипи за работа од пионерските и младинските школи, па се до сениорската екипа“, дополни Шишковски.
Вардар доби нов претседател, во наредниот период се најавува и целосно нова структура во клубот. Се шпекулира дека тренерското место ќе му биде доверено на Илчо Ѓоргиоски, дека клубот ќе влезе во преговори со неколку поранешни, повремени и стандардни македонски репрезентативци, дека финансиската конструкција на клубот ќе достигне до 800.000 евра на годишно ниво и што уште не. На такви работи се навикнавме во изминатите години кога станува збор за Вардар и неговата судбина.
|
