Aктивирана хипотека за „Космос“

Љубиша Станковиќ

Поради доцнење со исплатата на ратите за комуналии за објектот „Космос“, Градот Скопје и Општина Гази Баба ја активираа хипотеката на имот кој Фијат Цаноски го ставил во залог. Станува збор за имот во Скопје и во Струга, а хипотеката е во висина од 11 милиони евра.

Од Градот Скопје велат дека тие го најавиле тоа уште со соопштението кое беше лиферувано до јавноста во понеделникот, а од Општина Гази Баба не само што го потврдуваат активирањето на хипотеката туку појаснуваат дека предметот веќе му е предаден на извршител и сега се очекува тој да го реализира извршувањето.

Дали навистина на Цаноски ќе му биде активирана ставената хипотека ќе се знае најдоцна за една недела, односно колку што е рокот за уплата на парите што треба да ги плати за комуналии. Инаку, освен уплата на ратите, Цаноски ќе треба да да плати и камата, како и давачки за извршувањето.

Работниците што се ангажирани за уривање на станбено-деловниот комплекс „Космос“, обезбедени од редовни и специјални полициски сили, ги сечат носечките столбови на зградата, која требаше да има 14 ката. За време на нашиот престој, еден од столбовите веќе беше поткопан и се работеше на уривање на вториот столб, кој, пак, доколку биде исечен, најверојатно, ќе предизвика пад на целиот, односно на сите пет изградени ката.

„Досега, од она што можеме да го видиме оддалеку, уништена е половината од опремата. Станува збор за штета што се мери во милиони. Сега не ни дозволуваат да ја повлечеме и документацијата за 300 работници што работеа на изградбата на ’Космос’“, ни изјави пратеникот Фијат Цаноски.

Според засега непотврдени сознанија до кои дошол тимот на инвеститорот во уривањето на комплексот „Космос“, наводно, учествуваат лица што се осудени на затворски казни, на кои им овозможуваат напуштање на казнено-поправните установи, а кои, по се' изгледа, дека веќе биле пријавени како редовно вработени лица.

„Доколку успееме да докажеме кои се лицата што се ангажирани во уривањето на ’Космос’, тогаш сигурно дека и за нив ќе поднесеме кривични пријави“, велат од правниот тим на пратеникот Фијат Цановски, кој е и сопственик и инвеститор на големиот станбено-деловен комплекс.

Адвокатите на инвеститорот најавуваат поведување неколку постапки, но, според нивното кажување, тие се „заглавени“ од Општина Гази Баба и од градоначалникот Тони Трајковски.

Со случајот на Фијат Цаноски и неговиот станбено-деловен објект „Космос“ од вчера се запознаени и највисоките државни власти, странските амбасади и неколку меѓународни институции.

„Откако го добивме решението за отстранување на недостатоците, поднесовме предлог до Основниот суд Скопје 2 - Скопје за обезбедување докази, односно судот самиот да констатира до каде е стигната градбата, која Општината одлучила да ја урива. Оттаму дојде една судијка, која уредно им се легитимираше на полицајците што го обезбедуваат објектот, а потоа и им покажа и налог. Но, полицајците не само што не и' дозволија на судијката да влезе туку не сакаа и да се легитимираат“, вели адвокатката Бранка Атанасовска.

Нашите непотврдени сознанија говорат дека објектот бил посетен од судијката Лилјана Кацарска и дека одговорниот за безбедност не и' се легитимирал на судијката, но, наводно, појаснил дека имал наредба никој да не пушта да се приближи до комплексот „Космос“. Според истите сознанија, полицискиот раководител ја упатил судијката кај градоначалникот на Гази Баба за да и' даде дозвола за влез.

„Навистина не знам како е можно на инспекторката, како што тврди градоначалникот на Гази Баба, да не и' биде презентиран основниот проект, а таа да констатира дека објектот излегол за 143 сантиметри? Не знам врз каква основа го пресметала излегувањето? Замислете, инспекторката, при посета на објектот, во градежната книга не навела дека има какви и да е отстапувања“, вели инвеститорот Фијат Цаноски и потврдува дека му се јавиле педесетина купувачи на станови во комплексот „Космос“ и дека сите му дале поддршка. Купувачите, како што вели Цаноски, побарале тој да истрае во оваа работа, бидејќи биле убедени дека не сторил ништо незаконски.

„Како пратеник во Собранието на Република Македонија, ќе побарам свикување вонредна собраниска седница, а ќе побарам и формирање анкетна комисија, која ќе треба да го разгледа целиот случај. Конечно, мене ми е ограничено правото на движење со тоа што не ми се дозволува да влезам во објект што е во моја сопственост“, вели Цаноски. (Љ.С.)

Станбено-деловниот комплекс „Космос“, според основниот проект, треба да го сочинуваат две суперлуксузни згради. Фијат Цаноски, за потребите на „Космос“, од повеќе физички лица има откупено земјиште со површина од 35.000 квадратни метри, а од државата уште дополнителни 900 метри квадрати за што платил неколку милиони евра.