Рен: Мерките за штедење единствен начин Грција да избегне банкрот



28.06.2011, 15:29

Прифаќањето на планот за штедење од страна на грчкиот Парламент е единствен начин Грција да избегне банкрот, не постои „план Б“, предупреди денеска во Брисел еврокомесарот за економски и монетарни прашања Оли Рен.

Долгогодишната програма за строги економски мерки (2012-2015 година), чии детали беа утврдени минатата недела од грчката Влада и меѓународните кредитори, предвидува пакет мерки во вредност од 28,4 милијарди евра и приватизација за 50 милијарди евра.

Дебатите во грчкиот Парламент започнати вчера и прифаќањето на програмата в четврток се услов за добивање пари од ЕУ и ММФ, со кои земјата ќе ги врати долговите.

- Не постои план Б за избегнување инсолвентност, оцени Рен, повикувајќи ги грчките политички раководители да преземат своја одговорност.

Весникот „Фајненшел тајмс“ денеска пишува дека европските финансиски институции составиле план за продолжување на намалувањето на значителен дел од грчкиот државен долг за 30 години, откако кредиторите се обединија околу предлогот на Франција за примена на моделот со „Брејди обврзниците“, користени за спас на Латинска Америка пред 22 години.

Околу 50 претставници на банкарскиот и осигурителниот сектор, повеќето од Франција и Германија, се сретнаа вчера во Рим, за да го разгледаат предлогот на француските банки за доброволно продолжување на матуритетот на половината од долгот во наредните три години преку нови 30-годишни обврзници.

Француската банка Бе-Ен-Пе (БНП) поседува најголем дел од грчките обврзници во износ од пет милијарди евра, додава весникот.

Според друг напис на „Фајненшел тајмс“ европски претставници го разгледуваат „планот Б“ за секој случај, ако Парламентот во Атина не успее да го одобри пакетот мерки за строго штедење во износ од 28 милијарди евра. Тие мерки се условот под кој меѓународните кредитори во јули ќе одделат помош од 12 милијарди евра.

Инаку, во Грција денеска започна 48-часовен генерален штрајк, организиран од двата најголеми синдиката - Здружена конфедерација на трудот (ГССЕ) и Синдикатот на државните службеници (АДЕДИ).