Скопје

Груевски доби мандат да формира нова Влада



28.06.2011, 14:05

Претседателот на Република Македонија Ѓорге Иванов денеска му го врачи мандатот за состав на Владата на Никола Груевски, лидер на ВМРО-ДПМНЕ, партија која на предвремените парламентарни избори освои најмногу пратенички места.

По добивањето на мандатот, Груевски има 20 дена до Собранието да ги достави составот и програмата на новата влада.

Претседателот на Собранието, во рок од три дена од денот на приемот на известувањето од претседателот на државата ги известува пратениците за кандидатот за претседателот Владата.

Предлогот за состав на Владата се доставува во писмена форма. Седницата за избор на Владата се одржува во рок од 15 дена од денот на приемот на предлогот за состав на Владата и програмата. По програмата на мандаторот и предлогот за состав на Владата, Собранието води единствен претрес, кој треа најмногу два дена.

Гласањето за избор на Владата се врши по предлогот за соста на Владата во целина, со јавно гласање. Гласањето се врши по завршувањето на претресот, а најдоцна на полноќ. Собранието ја избира Владата со мнозинство гласови.

Никола Груевски, кој е шести премиер од независноста на Македонија, а по трет пат добива можност да формира влада откако ВМРО-ДПМНЕ победи на изборите во 2011, 2008 и 2006 година.

Вицепремиерот за спроведување на Рамковниот договор вчера Абдулаќим Адеми изјави дека е договорена заедничка владина платформа меѓу ДУИ и ВМРО–ДПМНЕ.

- Во платформата ќе бидат сите теми и сите отворени прашања што досега не се затвориле и можеби ги нарушувале меѓусебните односи. Со затворање на сите теми ние сакаме на Македонија да и обезбедиме европска иднина, како и економски развој. Ова е првпат во плурална Македонија, владината програма да биде заедничка и составена од изборните програми на двете партии-победнички на изборите - изјави Адеми.

Според него, се уште не се знаат имињата на новите министри.

Ермира Мехмети - Деваја од ДУИ, во саботата по изборот на претседател на Собранието, рече дека првичната поделба на позициите и ресорите во новата власт ќе биде 2:1.

На првата конститутивна седница која се одржа во саботата, Собранието едногласно ги верификуваше мандатите на новите 123 пратеници во Законодавниот дом, а Трајко Вељаноски беше повторно избран за прв човек на оваа институција.