Претходен број

Љубовна приказна заврши со убиство и самоубиство

Крвав крај на љубовната врска меѓу скопјанецот Игор Бучкоски и делчевката Елена Дујовска

Горан Адамовски

Голема трагедија се случи вчера околу пладне во скопската населба Капиштец. Дваесет и деветгодишно момче ја застрела поранешната девојка, а потоа си го одзеде животот, пукајќи си во глава. Причина за крвавото злосторство се говори дека е прекинувањето на двегодишната љубовна врска меѓу двајцата млади. Момчето, наводно, не можело да прифати дека е готово меѓу нив, па се одлучило за суров крај, кој во црно зави две семејства.

Крвавиот пир се случи вчера околу 12,30 часот на улицата „Миле Поп Јорданов“, во станбениот комплекс кај хотелот „Гранит“. Игор Бучкоски (29) од Скопје дошол пред зградата во која живеела неговата поранешна девојка, Елена Дујовска (26) од Делчево и ја убил, а потоа се самоубил.

„Момчето телефонски и' се јави на девојката, и' рече да се симне пред зграда. Таа се симна долу, почнаа да се караат, извади пиштол, таа го молеше да не пука, викаше ‘немој, немој‘. Тој пукна двапати во неа, потоа и во себе. Страшно, не можам да ги избришам сликите од глава“, еден од шокираните очевидци го пренесува кошмарот што го преживеал.

Според соседите и жителите во таканаречената „зграда на Гранит“, Дујоска била апсолвентка и ќерка на еден од функционерите во градежната фирма. Таа живеела во станот од татка си, а пред извесно време, во него се вселил и Игор. Но, пред еден месец, љубовта пукнала, врската била прекината, а момчето се иселило од станот. Игор никако не успевал да се помири со крајот.

„Тој и' упатувал закани и ја малтретирал“, велат од полицијата. Игор барал да се смири со Елена и да продолжат да живеат заедно. Вчера, Бучкоски дошол пред зградата во која живеела делчевката.

Неколку минути подоцна, телата на поранешните љубовници лежеа на асфалтот пред зградите во близина на хотелот „Гранит“.

„И јас дознав од соседите за тоа што се случило. Страшна трагедија. Девојчето беше многу културно и воспитано. Апсолвентка на Градежниот факултет во Скопје, животот беше пред неа“, потресено зборуваше еден од соседите.

Увидот на надлежните не беше започнат ниту еден час по убиствата. Се чекаше истражен судија и заменик-обвинител. Телото на девојката беше прекриено со бел чаршаф, а на момчето стоеше откриено уште долго потоа. Во близина на телата, полицијата го пронајде пиштолот „чешка зброевка“, со кој било извршено злосторството. Се утврдува дали момчето имало дозвола за користење оружје. Телата на Дујовска и Бучкоски се предадени за обдукција.