По 15 години, ракометарките на Ѓорче Петров загубија меч во домашното првенство
Ракометарките на Кале Кичево го направија тоа што долги години се чинеше невозможно - го победија Ѓорче Петров со 28:27 во првенствен натпревар, нанесувајќи му го првиот пораз на освојувачот на Лигата на шампионите во 2002 година на домашна сцена по 15 години! Со успешно изведениот седмерец на пет секунди до крајот, десниот бек Александра Славковска го урна митот за непобедливост во Македонија на својот поранешен клуб и го означи почетокот на големото славење на неколкуте стотини сведоци на историскиот настан во салата „Јанчица“.
Пеналот беше кулминација на возбудувањата во финишот, кога гостинките од Скопје се вратија по четири гола негатива и израмнија на 24:24, одржуваа нерешено до 27:27, а потоа им пресуди најефикасниот играч на средбата со 12 гола. Клучен момент, сепак, беше црвениот картон на десет минути до крајот за Мирјета Бајрамовска, која дотогаш постигна девет гола и остана прв стрелец на Ѓорче Петров на овој меч.
Единствениот првак на Македонија по осамостојувањето останува фаворит и за 17. титула, бидејќи по 16 кола има 11 бода повеќе од Жито Прилеп и од Кале Кичево, кои го делат второто место на табелата.
Кале Кичево - Ѓорче Петров 28:27
Полувреме: 17:16. Сала: „Јанчица“ во Кичево. Гледачи: 600. Судии: Огненов и Стефановски. Седмерци: Кале Кичево 6/8, Ѓ. Петров 2/4. Исклучувања: Кале Кичево 4 мин., Ѓ. Петров 6 мин.
Кале Кичево: Стефановска 1, Масева 5, Грујоска 4, Гроздановска 2, Кленкоска-Затуровска 3, Костеска 1, Наковска, Маневска, Славковска 12, Николовска, Здравеска, Јаковлеска.
Ѓорче Петров: Крижанац, Тодоровска, Стојановска, Е. Ѓорѓиевска 8, Атанасовска, Бајрамовска 9, Штерјова 3, Миовска, Д. Ѓорѓиевска 5, Атанасова, Стојковска 1, Николиќ 1. |
