ЕП 2012 продадено за 11 милиони евра?

Додека една од најголемите корупциски афери ја тресе Светската фудбалска федерација (ФИФА), германските медиуми носат приказна за наводна продажба на организација на настан и под капата на Европската фудбалска асоцијација (УЕФА). Според пишувањето на минхенскиот дневен весник „Зидојче цајтунг“, службеникот на УЕФА и член на Извршниот одбор на кипарскиот фудбалски сојуз, Спирос Марангос, тврди дека постојат бројни сведоци за наводна продажба на Европското првенство во 2012 година во Полска и Украина.

Тајните договори, според негови тврдења, се одржале во една кипарска правна канцеларија и во нив учествувале високи службеници на УЕФА. Во игра наводно биле 11 милиони евра.

Марангос за „Зидојче цајтунг“ рече дека изјавите на сведоците веќе со месеци безуспешно се обидува да му ги достави на претседателот на УЕФА, Мишел Платини. Од УЕФА засега не го коментираат овој случај.

За потсетување, УЕФА во април во 2007 година ја додели организацијата на ЕП 2012 на Полска и на Украина. Нивната заедничка кандидатура доби осум гласа, Италија доби четири, а хрватско-унгарската не доби ниеден глас.