Гамбит Асеко го подели 14. место во Пловдив

Според Бухолц, единствениот тим од Македонија е 22. на ЕКК

Роберт Димитриевски

Шахистите на Гамбит Асеко го исполнија планот да се пласираат пет места повисоко од стартната 25. позиција според тимскиот рејтинг 2411, завршувајќи на делба на 14. место меѓу 49 екипи што учествуваа на 26. Европски клупски куп во Пловдив од 17 до 23 октомври. Според Бухолц, пак, единствениот македонски претставник е 22. со осум меч-бода и со 20,5 поени освоени по табли.

Вицешампионот на Македонија забележа четири победи и три пораза. Во последните три кола прво изгуби од осморангираниот Ашдод од Израел со 4,5-1,5, а потоа слевеше со 3,5-2,5 против Бетсон (32.) од Англија и со 4,5-1,5 во дуелот со Падова (27.) од Италија.

Велемајсторот Борис Чаталбашев (2606) во завршниот круг против Италијанците славеше со црни фигури на првата табла против ексрепрезентативецот на Македонија, ВМ Кирил Георгиев (2685). По цел поен освоија и интермајсторот Марјан Митков (2392) на втората против ИМ Енио Арланди (2430), ФИДЕ-мајсторот Зоран Стојчевски (2355) на четвртата против ФМ Валерио Лучани (2212) и ФМ Оливер Органџиев (2321) на шестата против Кристијано Кваранта (2116). ИМ Орце Данчевски (2402) на третата ремизира со ФМ Алесио Валсеки (2331), а ИМ Атанас Кизов (2389) на петтата изгуби од Стефано Наваро (2274).

Митков и Стојчевски имаат ефект 4,5/7, кој им го подобри рејтингот за 22 поена. Останатите потфрлија: Данчевски има 2/7 (-7 рејтинг-поени), Кизов 2/6 (-10), Органџиев 2,5/6 (-6) и резервата, ФМ Љубиша Андоновски (2295), заврши со 1/4 (-5).

Четвртиот носител Економист од рускиот град Саратов ја одбрани европската круна како единствен со 13 меч-бода од можни 14.

Резултати од последното коло: Економист - Југра 3-3; Сокар - Москва 3-3; Мика - Баден Баден 2,5-3,5; Ејнатен - Чернигив 2,5-3,5; Санкт Петербург - Беер Шева 3,5-2,5; Золинген - Ашдод 1,5-4,5; Нови Бор - Ривненски 3-3; Гласинац - Вердер 1,5-4,5; Урал - Осло 5,5-0,5; Бихаќ - Најден Воинов 3,5-2,5 итн.

Конечна табела: Економист 13 (28,5), Југра 11 (27,5), Чернигив 11 (27,5), Сокар 11 (27), Баден Баден 11 (27) итн.