Ватерполо репрезентацијата се „помакедончува“

За мечот со Србија повикани по седум играчи од Работнички и странци со македонски пасош

Роберт Димитриевски

Најавеното вртење на листот по дебаклот на Европското првенство во Загреб, каде што беше освоено последното место, во ватерполо репрезентацијата на Македонија ќе почне да се применува веќе против Србија во Светската лига со повикувањето еднаков број домашни играчи и интернационалци. Владимир Димовски, член на Управниот одбор на Пливачката федерација на Македонија, најави дека за стартниот дуел во Светската лига на 16 ноември од 19 ч. во Белград ќе конкурираат по седуммина играчи од Работнички и од странство.

Хрватите со македонски пасош Далибор Перчиниќ, Даниел Бениќ, Здравко Делаш и Игор Рачуница, заедно со Србите со македонско државјанство Иван Вуксановиќ, Владимир Кречковиќ и Ненад Босанчиќ, кои ги бранеа боите на Македонија во Загреб, ќе го носат македонскиот дрес и во вторник. Од репрезентацијата се повлекоа Еди Бркиќ, Владимир Латковиќ и капитенот Ненад Петровиќ, па лентата во иднина ќе ја носи голманот Перчиниќ. Како повозрасен, тој доби предност во однос на Вуксановиќ.

Синоќа требаше да бидат финализирани преговорите со екскапитенот Сашко Поповски околу преземањето на водењето на националниот тим по оставката на Стеван Нонковиќ на последниот ден од ЕП. Според Димовски, со 99-процентна сигурност Поповски ќе седи на клупата барем против бранителот на трофејот во Светската лига.

Репрезентативците треба да се соберат в понеделник во Белград на вечерен тренинг, а ќе тренираат и утредента претпладне во базенот „Ташмајдан“, во кој ќе се одигра натпреварот.

Покрај Македонија, во групата од Светската лига се и Германија и Шпанија. Токму светскиот вицешампион Шпанија е следниот противник на најдобрите македонски ватерполисти во почетокот од декември, кога „црвената фурија“ доаѓа на двомеч во Скопје. Прво на 5 декември на Олимпискиот базен „Центар“ ќе се одигра мечот од квалификациите за Европското првенство 2012 во Ајндховен, а за два дена подоцна е закажана средбата од Светската лига.