Поглед

Инсулински маки

Го��ко Ефтоски

Дијабетичарите од тетовскиот крај имаат сериозни проблеми во редовното снабдување со инсулин. Маките на болните од шеќерна болест за добивање на неопходната терапија се константни. Се случува по неколку дена да доаѓаат во амбулантата и да се изначекаат пред вратата на лекарот, а да се вратат со празни раце. И тоа само за да добијат една доза што се троши во еден месец. Што ќе биде наредниот пат, за колку време ќе се добие инсулин, се мислите на пациентите што боледуваат од дијабетес.

Во Клиничката болница во Тетово само пред амбулантата за дијабетичари може да се забележат турканици. Поминуваат часови за да стигнат до бројче што треба да создаде некаков ред во метежот. Но, тоа не помага многу и не го решава проблемот. Затоа што бројчињата, кои се сигурен пат до лекарот, ги има само педесетина, а дневно со инсулин треба да се снабдат 150 лица.

Долгите редици и неизвесноста ќе се добие денес терапија или треба да се дојде и утре, предизвикуваат нервозни реакции на дијабетичарите, кои и онака се изразени поради карактерот на болеста. Неизбежен дел од таквиот хаос се бучните расправии, па и обидите за физички пресметки. А тогаш и шеќерот се крева.

Во тетовското подрачје се регистрирани над осум илјади болни од шеќер. Меѓу нив голем дел се и деца. Пациенти има се' повеќе. Дневно се откриваат од еден до три нови случаи.

Единственото место каде што можат да се снабдат со лекови е амбулантата и специјалната аптека во рамките на Клиничката болница во Тетово. За сите важи централизираното снабдување. Не се знае зошто е воведен ваквиот принцип. Но не функционира како што треба. Инсулинските маки на дијабетичарите продолжуваат. Затоа мора нешто да се преземе. За почеток да се поедностави снабдувањето со овој неопходен лек.