Ѓорге Иванов ја презеде должноста претседател на Република Македонија
Иванов со потпишувањето на свечената изјава попладнево и формално ја презеде должноста
Web Special 12:43 12.05. - Ѓорге Иванов, со потпишувањето на свечената изјава дека во наредните пет години совесно и одговорно ќе ја води државата, попладнево и формално ја презеде должноста претседател на Република Македонија.
Иванов и во првото обраќање пред пратениците и присутните гости на неговата инаугурација во Собранието вети дека ќе даде се од себе и ќе го вложи целиот свој капацитет и кредибилитет за добросостојбата на држава и граѓаните.
- Ги поттикнувам и поддржувам сите политички лидери, но и независните интелектуалци, бизнисмените и сите луѓе да се однесуваат одговорно кон нашето најголемо национално богатство – добрите односи меѓу заедниците и меѓу граѓаните. Мојата политичка агенда е јасна и недвосмислена: Македонија членка на НАТО и на Европската Унија, силна, почитувана и рамноправна, а нејзините граѓани горди, богати и среќни. За таа цел, Македонија продолжува да чекори без запирање, да чекори на патот на евроатлантските интеграции, водејќи одговорна надворешна и внатрешна политика, посветено спроведувајќи ги највисоките стандарди, истакна меѓу другото Иванов.
Новиот претседател на Република Македонија на доаѓање во Собранието беше пречекан од досегашниот шеф на државата Бранко Црвенковски и гардисти на АРМ.
Официјалната церемонија ја следат и неколкумина странски државници, меѓу кои и хрватскиот претседател Стипе Месиќ, српскиот Борис Тадиќ, албанскиот Бамир Топи и црногорскиот претседател Филип Вујановиќ, со кои по инаугурацијата новиот макеоднски претседател ќе има билатерални средби.
На чинот на инаугурација присуствуваат и премиерот Никола Груевски и владиниот кабинет, како и претставници на други државни институции, на дипломатскиот кор, на судството, на верските заедници...
По свечената седница ќе има коктел во Кристалната сала, по што ќе следува и „претседателското кафе“ на новиот претседател Иванов и досегашниот Црвенковски. (МИА)
|
